परभणी ः हिंगोली येथील एका दरोड्याच्या गुन्ह्यातील मुख्य आरोपीस स्थानिक गुन्हे शाखेच्या पथकाने मंगळवारी (ता.16) पाथरी शहरातील सेलू कॉर्नर परिसरातून अटक केली. त्याच्याकडून चारचाकी वाहन ही जप्त करण्यात आले आहे.

हिंगोली ग्रामीण पोलिस ठाण्यात दाखल असलेल्या दरोड्याच्या गुन्ह्यातील मुख्य आरोपी विनोद अशोक मस्के (वय 29, रा. तळेगाव ता. घनसावंगी जि.जालना) हा पाथरी येथे फोर्ड कंपनीची इकोस्पोर्ट वाहन घेवून येत असल्याची माहिती हिंगोली ग्रामीण पोलिस ठाण्याचे सहायक पोलिस निरीक्षक श्री. बंदखडके यांनी परभणी स्थानिक गुन्हे शाखेला दिली होती. या माहितीवरून स्थानिक गुन्हे शाखेचे फौजदार चंद्रकात पवार यांनी पाथरी येथील सेलू कॉर्नरवर सापळा लावून या वर्णनाची गाडी व आरोपीस ताब्यात घेवून त्याची अधिक चौकशी केली असता त्याने हिंगोली येथे घडलेल्या गुन्ह्याची कबुली दिली. सदर आरोपीस गुन्ह्यामधील वापरलेल्या दोन चारचाकी वाहनासह ताब्यात घेतले.

हेही वाचा -  जिंतूर तालुका संभाव्य पाणीटंचाई : सव्वादोन कोटी खर्चाचा प्रस्तावित आराखडा

पोलिस अधीक्षक जयंत मीना, अतिरीक्त पोलिस अधीक्षक मुमक्का सुदर्शन, सहाय्यक पोलिस अधीक्षक अविनाश कुमार यांच्या मार्गदर्शनाखाली फौजदार चंद्रकात पवार, फौजदार विश्वास खोले यांच्यासह कर्मचारी सुग्रीव केंद्रे, निलेश भुजबळ, शंकर गायकवाड, यशवंत वाघमारे, अजहर पटेल, दीपक मुदीराज, अरुण कांबळे, पाथरी पोलिस ठाण्याचे सहाय्यक फौजदार श्री.राऊत, कर्मचारी श्री.गिराम यांनी ही कारवाई केली.

गाडीचे नंबर ही बदलले

परभणी स्थानिक गुन्हे शाखेच्या पथकाने आरोपी विनोद अशोक मस्के यास अटक करून अधिक तपासासाठी हिंगोली ग्रामीण पोलिसांच्या हवाली केले. आरोपीकडे गुन्ह्यामध्ये वापरण्यात आलेली महिंद्रा कंपनीची गाडी (क्र.एम.एच.12, व्हि.जी. 9999) या गाडीचे कागदपत्र तपासले असता तीचा आर.टीओ पासींग (क्र. एम.एच. 22 ए.डी. 7) असा असल्याचे समजले. आरोपीने गाडीचा नंबर चोरी करण्याच्या उद्देशाने बदललेला असल्याचे पोलिस तपासात उघड झाले आहे.

संपादन- प्रल्हाद कांबळे