बीड : अल्पवयीन मुलीच्या छेडछाड प्रकरणी बीडचे प्रमुख जिल्हा व सत्र न्यायाधीश हेमंत शं. महाजन यांनी शुक्रवारी (ता.२४) निकाल दिला. त्यांनी आरोपीला पाच वर्ष सश्रम कारावासाची शिक्षा सुनावली. अब्दुल रहमान ऊर्फ एरार नवाब हाश्मी असे शिक्षा झालेल्या आरोपीचे नाव आहे. त्याने बीड येथे राहणाऱ्या एका अल्पवयीन मुलीला शहरातील लाइफलाईन हॉस्पिटलजवळ अडवून तिचा विनयभंग केला व मारहाण केली होती. या प्रकरणी मुलीने शिवाजीनगर पोलिस ठाण्यात (ता.११ मे २०१८) रोजी तक्रार दिली होती.

तक्रारीवरून आरोपी अब्दुल रहमान ऊर्फ एरार याच्या विरोधात गुन्हा दाखल करण्यात आला होता. सदर प्रकरणाचा तपास तत्कालीन सहायक पोलिस निरीक्षक आर. पी. कोलते यांनी करून तपासाअंती अंतिम दोषारोप पत्र न्यायालयास सादर केले. सरकार पक्षातर्फे सहा साक्षीदार तपासण्यात आले. तपासी अधिकारी यांनी केलेल्या भक्कम तपासाच्या आधारावर व अॅड. मंजूषा दराडे यांनी केलेल्या युक्तिवादावर न्यायालयाने आरोपीस दोषसिध्द ठरवले.

न्यायालयाने आरोपीस कलम ७ व ८ पोक्सो मध्ये पाच वर्ष सश्रम कारावास आणि दोन हजार रुपये दंड, दंड न भरल्यास तीन महिने अतिरिक्त सश्रम कारावास अशी शिक्षा सुनावली. कलम ३२३ भादंविमध्ये एक वर्ष सश्रम कारावास आणि एक हजार रुपये दंड, दंड न भरल्यास १५ दिवस अतिरिक्त सश्रम कारावासाची शिक्षा सुनावली. आरोपीस दोन्ही शिक्षा एकत्रित भोगायच्या आहेत. सदर प्रकरणात पैरवीचे कामकाज सी. एस. इंगळे व सी.एस. नागरगोजे यांनी पाहिले.