कळमनुरी : पारंपरिक शेती व बियाण्याच्या वाणामध्ये बदल करीत चाफनाथ येथील एका शेतकऱ्याने अमेरिकन पद्धतीने सोयाबीन लागवड केली. त्याचा त्यांना फायदा झाला असून, त्यांच्या शेतामधील सोयाबीनच्या प्रत्येक रोपट्याला जवळपास ४०० शेंगा लागल्या आहेत. परिसरातील शेतकऱ्यांनी अधिक उत्पादन देणाऱ्या या सोयाबीन प्लॉटची पाहणी करीत पुढील काळात शेतीमधील बदलाची तयारी चालवली आहे.

तालुक्यातील चाफनाथ येथील शेतकरी माधवराव चौतमल यांनी आपल्या एक एकर शेतीमध्ये या अमेरिकन सोयाबीन वाणाची लागवड केली. याकरिता त्यांनी जालना जिल्ह्यातील शेतकऱ्याकडून प्रती किलो हजार रुपये दराने बियाणे विकत घेऊन चार फूट लांबीवर दीड फुटाच्या अंतरावर टोकन पद्धतीने बियाणांची लागवड केली. याकरिता त्यांना एकरी सात किलो बियाणे लागले. सध्या त्यांच्या शेतीतील सोयाबीनच्या प्रत्येक रोपट्याला साधारणपणे ४०० शेंगा लगडल्या आहेत.

सरासरीपेक्षा दुप्पट उत्पन्न देणारा त्यांचा हा प्रयोग यशस्वी झाला आहे. शेतकऱ्यांना अधिक उत्पन्न देणाऱ्या या वाणाची माहिती व्हावी याकरिता चाफनाथ येथे शेतकऱ्यांसाठी आयोजित कार्यशाळेकरिता परिसरातील व परजिल्ह्यातील शेतकऱ्यांनी हजेरी लावून कमी खर्चात अधिक उत्पादन देणाऱ्या सोयाबीन लागवड व बियाणांची माहिती घेतली. यावेळी सूर्याजी शिंदे, संजय नखाते, श्याम वानखेडे, डॉ. वसंतराव पतंगे, बापूराव जाधव, शिवाजी शिंदे, बाबूराव पोळ, गंगाराम पाटील, सुभाष अडकिने, दिगंबरराव कदम, दिगंबरराव बिटरगावकर, सखाराम पांडव, रमेशराव भोयर, डॉ. शरद जाधव, सुदर्शन धुळे, विठ्ठल बेलखेडे, कैलास गुंजकर, गुणानंद पतंगे, शेतकऱ्यांची उपस्थिती होती.

यावेळी डोंगरकडा येथील प्रगतिशील शेतकरी चंद्रकांत कुलकर्णी यांनी सांगितले की सद्यःस्थितीत परंपरागत शेती करताना शेतकऱ्यांना लागवड खर्च व उत्पादन खर्चाचा ताळमेळ बसत नसल्याचे चित्र आहे. या स्थितीत आधुनिक व संशोधितपणे विकसित झालेल्या अधिक उत्पादन देणाऱ्या बियाण्याच्या वाणाची शेतकऱ्यांनी लागवड करून आधुनिक पद्धतीने शेती करण्याचा दृष्टिकोन ठेवल्यास शेतीमधून मिळणाऱ्या उत्पन्नाच्या माध्यमातून आर्थिक समतोल साधला जाऊ शकतो.

सोयाबीन बियाणांची चार फुटांच्या बेडवर व दीड फुटाच्या अंतरावर टोकन पद्धतीने लागवड केली. सोयाबीनच्या प्रत्येक रोपट्याला जवळपास ४०० शेंगा लगडल्या असून, यामधून सरासरीपेक्षा दुप्पट उत्पन्न मिळणे अपेक्षित आहे.

- माधवराव चौतमल, शेतकरी