औरंगाबाद - खरिपाचा हंगाम अंतिम टप्प्यात आहे; मात्र अजूनही औरंगाबाद विभागात बॅंकांनी पीककर्जाची उद्दिष्टपूर्ती केली नसून अनेक शेतकरी पीक कर्जापासून वंचित आहेत. त्यामुळे त्यांना नाइलाजाने कीटकनाशके, खतांसाठी खासगी सावकारांचे उंबरठे झिजवावे लागत आहेत.

या वर्षी औरंगाबाद विभागाला पीककर्ज वाटपाचे 4 हजार 848 कोटींचे उद्दिष्ट होते. त्यापैकी ऑगस्टअखेर 1 हजार 625 कोटी रुपये कर्ज वाटप झाले. त्याची टक्केवारी केवळ 33.52 टक्के एवढीच आहे. विभागातून ग्रामीण बॅंकांनी सर्वांत जास्त कर्जवाटप केले. त्यापाठोपाठ जिल्हा मध्यवर्ती बॅंकांनी कर्ज वाटप केले. व्यापारी बॅंकांनी सर्वांत कमी कर्ज वाटप केले.

वाटप केलेले कर्ज
- ग्रामीण बॅंक - 70.94 टक्के
- जिल्हा मध्यवर्ती बॅंक - 32.82 टक्के
- व्यापारी बॅंक - 26.81 टक्के