औसा (लातूर): कामाच्या आणि शिस्तीच्या बाबतीत उपमुख्यमंत्री अजित पवार किती जागरुक आहेत हे वेळोवेळी त्यांच्या कृतीतून दिसून येते. कोरोनाच्या काळात त्यांनी स्वःतासह आपल्या कार्यकर्त्यांना दिलेले शिस्तीचे धडे सबंध महाराष्ट्राने पाहिले आहेत. याचाच प्रत्यय गुरुवारी (ता. १९) रोजी पुन्हा एकदा औसेकरांनी अनुभवला. निमित्त होते औसा पालिकेच्या वतीने करण्यात आलेल्या विविध विकास कामांचा लोकार्पन सोहळ्याचे. अजित पवार जवळ कोणीही नसताना आपल्या केबिनमधून औसेकरांशी संवाद मास्क लाऊन साधत होते तर औसा पालिकेतील पदाधिकारी व अधिकारी कर्मचारी त्यांना विनामास्क ऐकत होते. याच गोष्टीला धरत दादांनी एकाच्याही तोंडाला मास्क नाही अवघड आहे बाबा तुमचं... म्हणत नाराजी व्यक्त केली होती.

अजित दादांची ही पारखी नजर आणि बारीक सारीक गोष्टीवर त्यांचा असलेला कटाक्ष औसेकरांना खूप भावला. गुरुवारी दिवसभर शहरातील लोकांमध्ये अजित पवारांनी पालिका पदाधिकारी व अधिकाऱ्यांना फटकारल्याची आणि त्यांच्या बारीक नजरेची जो तो चर्चा करताना दिसून आला. कोरोनाच्या संकट काळात उपमुख्यमंत्री अजित पवारांनी स्वःतापासून एक शिस्त पाळल्याचे आपल्याला दिसून येते. त्यांनी अतिउत्साही कार्यकर्त्यांना गर्दी करुन त्यांचे स्वागत करण्यासाठी फुलांचा हार व गुच्छ देताना काही तरी शिस्त पाळा, कोरोनाची लढाई अशाने कशी जिंकता येईल अशा शब्दात झापले होते.

कोरोनाच्या कालावधीत गेल्या दोन वर्षात त्यांच्या तोंडावरचा मास्क निघालेला कोणीच पाहिला नाही. लोकप्रतिनिधींनी स्वःतापासूनच शिस्त लावायला हवी यावर दादा ठाम आग्रही असतात. ती शिस्त त्यांनी स्वःता तर पाळलीच आहे पण आपल्या कार्यकर्त्यांना व पदाधिकाऱ्यांना पण पाळण्याची नेहमीच सूचना दिली आहे. गुरुवारी औसा पालिकेच्या वतीने करण्यात आलेल्या विविध विकास कामांचा लोकापर्ण व शुुभारंभ सोहळा ऑनलाईन पद्धतीने सकाळी संपन्न झाला. यामध्ये औसा पालिकेचे नगराध्यक्षासह विविध पदाधिकारी व मुख्याधिकारी, कर्मचारी उपस्थित होते.