आखाडा बाळापूर ( जिल्हा हिंगोली ) : येथील शहरात पाणीपुरवठा मागील दहा दिवसापासून बंद असल्याने पाण्यासाठी ग्रामस्थांचे हाल होत आहेत.

आखाडा बाळापुर शहरावर मोरवाडी २५ गाव पाणी पुरवठा योजनेअंतर्गत पाणी पुरवठा करण्यात येतो. परंतु वीज वितरण कंपनीची थकबाकी लाखो रुपयाची असल्याने वीज वितरण कंपनीने मागील दहा दिवसापूर्वी २७ लाख रुपये थकबाकी भरा असा कडक पवित्रा घेत वीजपुरवठा बंद केल्याने मोरवाडी पाणीपुरवठा बंद झाला आहे. पाणीपुरवठा बंद असल्याने दुसरी नळ योजना नसल्याने पावसाळ्यात बाळापूर वासियांचे पाण्यासाठी मोठे हाल होत असून पाण्यासाठी ग्रामस्थांना भटकंती करावी लागत आहे.

हेही वाचा - ज्या काळात "भाकरी" साठी उन्ह- थंडी- वारा याची पर्वा न करता घरापासून कोसोदूर ऊस तोडण्याससाठी जावं लागणाऱ्या गेनूबाई व लक्ष्मण चव्हाण दाम्पत्याचा मुलगा हजारो कुटुंबाला राशन देणाऱ्या "ऑर्डर " वर सही करतो

पाणीपुरवठा कधी सुरु होईल हे सध्यातरी शक्य नसल्याने बाळापुरवासियांना पाण्यासाठी वणवण भटकावे लागत आहे. पाणीपुरवठा सुरु करण्यासाठी ग्रामपंचायतीचे पदाधिकारी दररोज वीज वितरण कार्यालयात पंचायत समिती कार्यालयात चकरा मारत आहेत. परंतु वीज वितरण कंपनीने २७ लाख रुपये भरा तरच वीजपुरवठा सुरु होईल असा पवित्रा घेतल्याने पदाधिकाऱ्यांनी वरिष्ठ स्तरावर प्रयत्न सुरु केले आहे. लवकरच पालकमंत्री वर्षा गायकवाड यांची भेट घेऊन त्यांच्या स्तरावर वीज वितरण कंपनीचे अधिकाऱ्यांशी बोलून पाणीपुरवठा सुरु करण्यात यावा अशी मागणी येथील पदाधिकारी करणार आहेत.

आखाडा बाळापूर येथे विविध करापोटी दीड कोटी रुपयांची थकबाकी असल्याचे ग्रामपंचायतच्या वतीने जाहीर करण्यात आले आहे. ही थकबाकी नागरिक लवकर भरत नसल्याने ग्रामपंचायतमधील कर्मचाऱ्यांच्या पगारी व वीज वितरण कंपनी व इतर खर्च करण्याकरिता ही अडचणी येत असल्याची चर्चा आहे.

संपादन- प्रल्हाद कांबळे