नांदेड : शासनाच्या वेळकाढू आणि मनमानी धोरणाविरोधात युनायटेड फोरम आॅफ बॅंक युनियनतर्फे दोन दिवसाचा संप पुकारण्यात आला आहे. त्याला नांदेडमध्येही पहिल्याच दिवशी म्हणजे शुक्रवारी (ता.३१ जानेवारी २०२०) उत्स्फूर्त प्रतिसाद मिळाला.

प्रदिर्घ काळापासून प्रलंबित असलेली बँक कर्मचाऱ्यांची वेतनवाढ, वाटाघाटी दरम्यान होत असलेला सरकारचा वेळकाढुपणा व केंद्र शासनाच्या मनमानी आर्थिक धोरणाविरोधात गा संप पुकारण्यात आला आहे. पहिल्याच दिवशी नांदेड जिल्हा बँकर्स कमेटी संघटनेच्या कर्मचारी व अधिकारी यांनी संपाला उत्स्फूर्त प्रतिसाद दिला. शहराच्या मध्यवर्ती भागात असलेल्या शिवाजीनगर येथील स्टेट बँकेच्या शाखेसमोर व नंतर कलामंदिर भागातील मुख्य शाखेसमोर शहर व जिल्ह्यातील विविध भागातुन आलेल्या बँक कर्मचाऱ्यांनी केंद्र सरकारच्या धोरणाविरोधात घोषणा देऊन परिसर दणाणून सोडला.

हे वाचलेच पाहिजे - सेनगावात टाकाऊ वस्तूंपासून बनविली कार्बाईड बंदूक

३१ जानेवारी ते एक फेब्रुवारी २०२० असे दोन्ही दिवस बँक कर्मचारी संपावर आहेत. संपाच्या निमित्ताने बँक ऑफ महाराष्ट्र कर्मचारी संघटना व एआयबीईएच्या वतीने आॅल इंडिया बँक आॅफ महाराष्ट्र कर्मचारी फेडरेशनचे महिला संयोजक अपर्णा मुखेडकर, राजु दुलेवाड, सागर दिक्षित, वैभव थोरकर, मंगेश हंबर्डे व एसबीआय एन.सी.बी. संघटनेच्या विजयलक्ष्मी अय्यर व इतर कार्यकर्त्यांनी पहिल्या दिवशीचा संप यशस्वी केला. सदरील धरणे-निर्देशनात नांदेड शहर व जिल्ह्यातील विविध बँकांतील कर्मचारी अधिकारी व उपस्थित होते.