परभणी : पूर्णा शहरात 2017 मध्ये झालेल्या दंगलीतील मुख्य आरोपीला स्थानिक गुन्हे शाखेच्या पथकाने शनिवारी (ता. 22) गंगाखेड नाका परिसरातून अटक केली.

पूर्णा शहरात 2017 मध्ये सार्वजनिक मिरवणुकीतील दंगल व नुकतीच ता.25 ऑगस्ट 2018 रोजी शहरात दोन गटात झालेल्या किरकोळ वादातून झालेल्या वादाने दंगल उसळली होती. या दंगलीत मोठ्या प्रमाणात दगडफेक झाली होती. या व इतर दंगलीत सक्रीय सहभाग नोंदवून टोळीचे नेतृत्व करणारा रेकॉर्डवरील आरोपी सोमनाथ नरहरी सोलव (वय 24, रा. बरबडी ता. पूर्णा) हा शनिवारी परभणी शहरातील गंगाखेड नाका परिसरात आला असल्याची माहिती स्थानिक गुन्हे शाखेचे पोलिस निरीक्षक प्रवीण मोरे यांना मिळाली होती. श्री मोरे यांनी या प्रकरणी तात्काळ कारवाई करत सापळा रचून सोमनाथ नरहरी सोलव यास ताब्यात घेतले. शासकीय नोकरावर हल्ले करणे, दंगा करणे, गैरकायद्याची मंडळी जमविणे, शस्त्र बाळगणे, प्राणघातक हल्ला करणे आदी गुन्हे त्याच्यावर दाखल आहेत. या कारवाईत पोलिस कर्मचारी सुग्रीव केंद्रे, लक्ष्मीकांत धुतराज, भगवान भुसारे, हरी खुपसे, दिलावर पठाण, जमीरोद्दीन फारुखी, निलेश भुजबळ, यशवंत वाघमारे, परमेश्वर शिंदे यांनी केली.