गोजेगाव ः औंढा नागनाथ तालुक्‍यातील केळी तलाव तुडुंब भरल्याने या तलावात परदेशी पक्ष्यांचे आगमन झाले असून सकाळ - सायंकाळी येथे त्‍यांचा किलबिलाट सुरू झाला आहे. पक्षी व त्‍यांचा किलबिलाट पाहण्यासाठी नागरिकांची या परिसरात गर्दी होत आहे. दरम्यान, जिल्ह्यात प्रेक्षणीयस्थळ असलेल्या विविध ठिकाणी असे पशुपक्षी दाखल होत असल्याने परिसर नटला आहे. 
   औंढा नागनाथ तालुक्‍यातील केळी येथे मोठा तलाव आहे. हा तलाव चार वर्षांनंतर तुडुंब भरला आहे. यामुळे या पाण्याचा उपयोग शेतकऱ्यांच्या विहिरी व विंधनविहिरींसह सिंचनासाठी होणार आहे. तलावातील पाणी एप्रिल, मे महिन्यापर्यंत राहणार आहे. त्‍यामुळे शेतकऱ्यांना रब्‍बी पिकांसह उन्हाळी पिकेदेखील घेता येणार आहेत. या तलावात पाणी असल्याने दरवर्षी मार्च महिन्यापर्यंत परदेशी पक्षी येथे कायम असतात. या वर्षी हा तलाव भरल्याने या तलावात परदेशी पक्ष्यांचे थव्वेच्या थवे दररोज येथे येत आहेत. सकाळ व सायंकाळच्या वेळी येथे पक्ष्यांचा किलबिलाट सुरू आहे.

तीन वर्षांनंतर परदेशी पाहुण्यांचे आगमन

येथे येणाऱ्या पक्ष्यांत प्लेमिंगो पक्ष्यांचादेखील समावेश ओह. या तलावात तीन वर्षांनंतर परदेशी पाहुण्यांचे आगमन झाले आहे. हे पक्षी दरवर्षी नोव्हेंबर,डिसेंबरमध्ये दाखल होत असून एप्रिल, मेपर्यंत यांचा मुक्काम केळी तलावावर असतो.

हेही वाचा...ही वस्तू उरली सणापुरतीच !

पाणकावळा, पानकोंबडाही दाखल

मध्यंतरी गेल्या दोन-तीन वर्षांपासून या भागात पुरेसा पाऊस झाला नसल्याने तलावातील पाणीसाठा वाढला नव्हता. मात्र, या वर्षी परतीच्या पावसाने हा तलाव पूर्ण भरल्याने परदेशी पक्ष्यांसह पाणकावळा, पाणकोंबडा आदी नावाने ओळखले जाणाऱ्या पक्ष्यांचे आगमन झाले आहे. तलावात येणाऱ्या पक्ष्यांचे थवे पाहण्यासाठी नागरिकांसह विद्यार्थी गर्दी करीत आहेत. 

हेही वाचा...ऑटोरिक्षांचा धुमाकूळ, भिकाऱ्यांचा प्रवाशांना त्रास

येलदरी, सिध्देश्‍वरमध्येही येतात परदेशी पाहूणे

हिंगोलीजवळ असलेल्या येलदरी, सिध्देश्‍वर धरण परिसरामध्येही परदेशी पाहूणे असलेले पक्षी नेहमी दाखल होतात. यंदा परभणीसह हिंगोली जिल्ह्यात समाधानकारक पाऊस झाल्याने पीक चांगले  वाढले आहे. याचा परिणाम शेतीवरही होत आहे. पर्यायाने पाणी उपलब्ध असल्याने शेतकरी समाधानी झाले आहेत.  

उन्हाळी पिकेदेखील घेता येणार

तलावातील पाणी एप्रिल, मे महिन्यापर्यंत राहणार आहे. त्‍यामुळे शेतकऱ्यांना रब्‍बी पिकांसह उन्हाळी पिकेदेखील घेता येणार आहेत. या तलावात पाणी असल्याने दरवर्षी मार्च महिन्यापर्यंत परदेशी पक्षी येथे कायम असतात. यामुळे पक्षांना फायदा होणार आहे.