NIA Raid: देशविघातक कारवाया करणाऱ्या संघटनांमध्ये सहभाग असल्याच्या संशयावरुन एटीएस आणि एनआयएने शनिवारी पहाटे तीन ठिकाणी छापेमारी केली. देशात अनेक ठिकाणी रेड झालेल्या आहेत. महाराष्ट्रात छत्रपती संभाजी नगर, जालना, मालेगाव येथील काही तरुणांना पहाटे ताब्यात घेण्यात आल्याची माहिती आहे.

शनिवारी पहाटे एनआयएकडून देशविघातक कार्य करणाऱ्या तरुणांवर देशभर कारवाईची मोहीम उघडण्यात आलेली आहे. यापूर्वीदेखील महाराष्ट्रातील संभाजी नगर, जालना आणि मालेगाव येथे एनआयएने छापेमारी केलेली होती.

पहाटेपासूनच महाराष्ट्रातील तीन ठिकाणी एनआयए आणि एटीएसच्या पथकाने छापेमारी करत काही तरुणांना ताब्यात घेतल्याची माहिती आहे. एनआयए आणि एटीएसने महाराष्ट्रात संयुक्त कारवाई केली आहे.

देशविघातक काम करणाऱ्या आणि जम्मू काश्मीरमधील संघटनांशी संबंध असणाऱ्या काही तरुणांना ताब्यात घेतल्याची प्राथमिक माहिती आहे. 'साम टीव्ही'ने हे वृत्त दिले आहे. नेमक्या कुठल्या लोकेशन्सवर छापेमारी झाली आणि किती तरुणांना ताब्यात घेतलं, याबाबत अद्याप माहिती मिळालेली नाही.

एनआयएने महाराष्ट्र, जम्मू-काश्मीर, उत्तर प्रदेश, आसाम आणि दिल्लीत असं एकाच वेळी 22 ठिकाणी छापेमारी केल्याची माहिती आहे. दहशतवादी कट रचल्याप्रकरणी ही कारवाई केली जात असल्याची माहिती आहे. काही लोकांना NIA ने ताब्याही घेतलं आहे.

ताब्यात घेण्यात आलेल्या तरुणांचा जैश-ए-मोहम्मद या दहशतवादी संघटनेशी संबंध असल्याचा NIA ला संशय आहे. महाराष्ट्रातील मालेगाव, जालना आणि संभाजीनगर येथे NIA च्या छाप्यांमध्ये एटीएसचे पथकही सोबत होते. NIA ने मालेगाव येथील होमिओपथी क्लिनिकमधून ४ जणांना ताब्यात घेतलं आहे. दहशतवादी कारवायांमध्ये त्यांचा सहभाग असल्याच्या कारणावरून त्यांची चौकशी सुरू आहे.