औरंगाबाद : हवामानात सातत्याने बदल होत असून मराठवाड्यात गुरुवारी (ता.१८) वादळी वाऱ्यासह विजांचा कडकडाट, गारपीट तसेच हलक्या ते मध्यम पावसाची शक्यता असल्याची माहिती वसंतराव नाईक मराठवाडा कृषी विद्यापीठातील ग्रामीण कृषी मौसम सेवा यांच्यातर्फे देण्यात आली आहे. यामध्ये प्रामुख्याने बीड, उस्मानाबाद, जालना, नांदेड, परभणी या जिल्ह्यांचा समावेश आहे. याशिवाय शुक्रवारी (ता.१९) उस्मानाबाद, नांदेड व हिंगोली जिल्ह्यात वादळी वारा, विजांच्या कडकडाटासह तुरळक ठिकाणी पाऊस पडण्याची तर औरंगाबाद, जालना, परभणी, बीड जिल्ह्यांत वादळी वारा, विजांचा कडकडाट व पावसासह तुरळक ठिकाणी गारपीट होण्याची शक्यता वर्तविण्यात आली आहे.

शनिवारी (ता.२०) बीड, उस्मानाबाद, लातूर आणि हिंगोली या चार जिल्ह्यांत वादळी वारा, विजांचा कडकडाटासह तुरळक ठिकाणी पाऊस पडण्याची तर औरंगाबाद, जालना, परभणी व नांदेड जिल्ह्यांत वादळीवारा, विजांचा कडकडाट व पावसासह तुरळक ठिकाणी गारपीट होण्याची शक्यता आहे. तसेच २१ मार्च रोजी मराठवाड्यातील आठही जिल्ह्यांत वादळीवारा, विजांच्या कडकडाटासह तुरळक ठिकाणी पाऊस पडण्याची शक्यता असल्याचेही कळविण्यात आले आहे.