औरंगाबाद : जिल्हा मध्यवर्ती सहकारी बॅंकेच्या बहुचर्चित रामकृष्ण गोदावरी उपसा सिंचन प्रकल्पाचे काम अंतिम टप्प्यात आले आहे. अतिवृष्टीमुळे या प्रकल्पाचे काम रखडले होते. येत्या महिनाभरात याचे काम पूर्ण होणार असल्याचे बॅंकेचे उपाध्यक्ष दामोदर नवपुते यांनी मंगळवारी (ता.19) सांगितले. 

रामकृष्ण गोदावरी उपास सिंचन प्रकल्पाच्या कामासाठी विधानसभा अध्यक्ष हरिभाऊ बागडे यांच्या माध्यमातून सरकारकडून पाच कोटी 96 लाख रुपयांच्या निधीतून हे काम करण्यात आले. यासाठीचे टेंडर काढून नवीन यंत्रसामग्री आणण्यात आली. तसेच मोटरपंप बसविण्यात आले. दरम्यान, परतीच्या पावसामुळे मोठ्या प्रमाणावर प्रकल्पात पाणी आले. यामुळे पाईप जॉइंटचे काम अडून पडले आहे. हे काम झाल्यानंतर प्रकल्पाचे काम पूर्ण होणार असल्याचे नवपुते यांनी सांगितले. 

हेही वाचा- औरंगाबाद जिल्हा परिषदेत पुन्हा येणार महिलाराज, यांना मिळू शकते संधी 

कसा आहे प्रकल्प? 

रामकृष्ण गोदावरी संस्थेच्या माध्यमातून रामकृष्ण गोदावरी उपसा जलसिंचन योजना वर्ष . ही योजना दोन वर्षे चालल्यानंतर बंद पडली. या योजनेसाठी जिल्हा बॅंकेने नाबार्डकडून कर्ज घेत शंभर कोटी रुपये भरत ही योजना आपल्या ताब्यात घेतली होती. त्यानंतर योजनेचा लिलाव करण्याचा प्रयत्न केला. पाइपलाइन विकायला काढली, तर दोन ते तीन कोटींशिवाय जास्त पैसे येणार नाही, म्हणून बॅंकेने ही योजना सुरू करण्यासाठी पुन्हा पुढाकार घेतला. पाटबंधारे विभागातर्फे पावणेसहा कोटी रुपये दुरुस्तीसाठी दिले. त्यानंतर सहकार कायद्यानुसार प्रक्रिया केली. यात बराचसा कालावधी लोटला गेला. पंप जुना झाला होता, त्यामुळे दुरुस्तीऐवजी नव्या पंपाची ऑर्डर देण्यात आली होती. त्यानंतर आता नवीन मशिनरी मागविण्यात आली. 

हेही वाचा -उपसरपंच म्हणाला, हे मुलं माझं नाहीच!नंतर...

25 ते 30 गावांना फायदा 

रामकृष्णा गोदावरी उपसा सिंचन प्रकल्पामुळे गंगापूर आणि वैजापुरातील 25 ते 30 गावांना फायदा होणार आहे. यासह दोन हजार हेक्‍टरपेक्षा जास्त जमीन सिंचनाखाली येईल. यामुळे या योजनेचे महत्त्व ओळखून कामाला गती देण्यात आली आहे. 

""पाईपची जोडणी केल्यानंतर वीजपुरवठ्यासाठी 27 लाख रुपये महावितरण कार्यालयास देऊन प्रकल्पासाठी याची ट्रायल घेणार आहोत. त्यानंतर हा प्रकल्प सुरू होईल. आतापर्यंत 95 टक्‍के काम पूर्ण झाले आहे. महिनाभराच्या आत याचा प्रत्यक्ष लाभ नागरिकांना मिळणार आहे.'' 
-दामोदार नवपुते, उपाध्यक्ष, जिल्हा मध्यवर्ती बॅंक