जालना : येत्या शनिवारी (ता.३१) वर्ष २०२२ चा अखेरचा दिवस आहे. मागील दोन वर्षांपासून कोरोना संसर्गामुळे अनेकांच्या कटू आठवणी असल्याने दोन वर्ष असे निघून गेले. मात्र, २०२२ वर्ष अनेकांसाठी सुखकर गेल्यानंतर या वर्षाच्या शेवटचा दिवस साजरा करण्यासाठी प्रत्येक जण प्लान करत आहेत. यात तळीरामांसाठी परमीट रुम आणि देशी दारू विक्रेत्यांनी चक्क पावणेतीन लाखांचे ८० हजार एकदिवसीय परवाने विकत घेतले आहे.(Aurangabad News)

थर्टी फर्स्ट रोजी बार हे नवीन वर्षाच्या पहाटे पाच वाजेपर्यंत सुरू राहणार आहेत. शिवाय वाईन शॉप आणि देशी दारू दुकाने ही मध्यरात्री एक वाजेपर्यंत सुरू राहणार आहेत. त्यामुळे पोलिसांसह राज्य उत्पादन शुल्क विभागाकडून ही या परवानाधारक मद्यविक्रीच्या ठिकाणी सतत तपासणी केली जाणार आहे. जर मद्य पिण्याचा परवाना नसेल तर ग्राहकांसह हॉटेल मालकालाही दंड केला जाणार आहे. त्यामुळे दंडाची रक्कम भरण्यापेक्षा राज्य उत्पादन शुल्क विभागाकडून एक दिवसाचा परवाना घेतलेला बरा अशी गत जिल्ह्यातील परमीट रुम, देशीविक्री करणाऱ्या दुकानदारांची झाली आहे.

राज्य उत्पादन शुल्क विभागाकडून एका व्यक्तीस देशी दारू पिण्यासाठी दोन रुपयांचा तर विदेशी दारू पिण्यासाठी पाच रुपयांमध्ये एकदिवसीय परवाना दिला जातो.

ऐनवेळेला परवाने कमी पडू नये, म्हणून आत्तापर्यंत तब्बल ८० हजार इतके एक दिवसीय परवाने जिल्ह्यातील परमीट रुम आणि देशी दारू विक्रेत्यांकडून घेण्यात आले आहेत. यात देशी दारूचे ४० हजार जणांचे एक दिवसाचे परवाने हे ८० हजार रुपये भरून घेतले आहेत. तर परमीट रुम मालकांनी तब्बल दोन लाख रुपये भरून ४० हजारांचे परवाने घेतले आहेत. त्यामुळे राज्य उत्पादन शुल्कचा महसूलही वाढला आहे.

थर्टी फर्स्टच्या अनुषंगाने राज्य उत्पादन शुल्कचे पथके स्थापन करण्यात आलेले आहे. ता.३१ डिसेंबर रोजी हॉटेल, ढाब्यांना भेटी देवून विना परवाना मद्य प्राशन करणाऱ्यांवर कारवाई केली जाईल. शिवाय ४० हजार देशी दारूचे व ४० हजार परमीट रुमचे एकदिवसीय परवाने राज्य उत्पादन शुल्क विभागाकडून वाटप केले आहेत.

- बी.ए. पडुळ निरीक्षक, राज्य उत्पादन शुल्क, जालना.