पैठण : वयाच्या २१ व्या वर्षी दरोडा टाकलेल्या आरोपीला तब्बल ३२ वर्षांनी म्हणजे त्याच्या वयाच्या ५३ व्या वर्षी पोलिसांनी अटक केली आहे. पैठण तालुक्यातील बीडकीन पोलीस स्टेशनमध्ये त्याच्यावर दरोड्याचा गुन्हा दाखल करण्यात आला होता. तेव्हापासून सदर आरोपी फरार होता.

अधिक माहितीनुसार, १५ ऑक्टोबर १९९१ रोजी बीडकीन परिसरातील गाढेगाव येथील एका शेतवस्तीवरील घरावर पाच दरोडेखोरांनी मध्यरात्री दीड वाजता सशस्त्र दरोडा टाकला होता. यावेळी त्यांनी काठ्या, कुऱ्हाडीने मारहाण करून दशहत पसरवत सोने, घड्याळ, रोख रक्कम असे मिळून सव्वातीन हजार रूपयांचा मुद्देमाल चोरला होता.

या धाडसी दरोड्यामध्ये सहभागी असलेल्या तीन जणांना पोलिसांनी तत्काळ अटक केली. यामध्ये मनोहर संपत बर्डे, अंताराम मनोहर बर्डे, ओंकार दगडू माळी या आरोपींनी अटक करण्यात पोलिसांना यश आले होते पण अशोक विनायक बर्डे आणि सुभाष बाबुराव बर्डे हे दोन आरोपी तेव्हापासून फरार होते.

मागच्या ३२ वर्षापासून अशोक हा पोलिसांना गुंगारा देत होता. तो आपल्या वास्तव्याच्या जागा आणी नावसुद्धा वारंवार बदलत होता. काही दिवसांपूर्वी गोपनीय माहितीच्या आधारे अशोक हा नगर जिल्ह्यातील श्रीरामपूर येथील पुणतांबा येथे एका वीटभट्टीवर काम करत असल्याची माहिती मिळाली. पण पोलीस तिथे पोहोचताच त्याने तिथूनही पोबारा केला. त्यानंतर पोलिसांनी त्याच्यावर पाळत ठेवण्याचा निर्णय घेतला.

दरम्यान, त्याचं मूळ गाव असलेल्या नेवासा तालुक्यातील भालगाव येथे तो येणार असल्याची माहिती पोलिसांनी मिळाली. यावरून पोलिसांनी सापळा रचून मध्यरात्री साडेबाराच्या सुमारास अशोकला पकडले. सध्या तो ५३ वर्षाचा असून त्याने तब्बल ३२ वर्षे पोलिसांना गुंगारा दिल्यानंतर अखेर त्याला पोलिसांनी जेरबंद केलं आहे.