कन्नड : माहेराहून सोने आणण्याची मागणी करत विवाहितेचा मानसिक व शारीरिक छळ करणाऱ्या सासरच्या ९ जणांविरोधात कन्नड ग्रामीण पोलिस ठाण्यात, विवाहितेच्या तक्रारीवरून गुन्हा दाखल करण्यात आला आहे.

कन्नड ग्रामीण पोलिसांनी सांगितले की, वैशाली मनोज कासार, वय (२७,रा.नैताळे ता.निफाड जि. नाशिक ह.मु.चिकलठाण ता.कन्नड) या विवाहितेने दिलेल्या फिर्यादीत नमूद केले की, ९ फेब्रुवारी २०१५ रोजी नैताळे येथील मनोज कासार यांच्यासोबत विवाह पार पडला.

लग्नानंतर सासरच्यांनी एक वर्ष चांगले वागविले यानंतर, माहेराहून सोने घेऊन ये असे म्हणत वेगवेगळ्या कारणांनी ९ फेब्रुवारी २०१५ च्या एक वर्षापासून आजपर्यंत सासरी नैताळे येथील घरी मनोज सुभाष कासार, जनार्दन कचरू कासार, प्रमिला सुभाष कासार सर्व (रा.नैताळे), लता सुनील आदमे, ननंद छाया संतोष आदमे, संतोष फकीरराव आदमे (रा.सोनेवाडी ता.सिन्नर), सोनाली राजेंद्र थोटे, शीला मनोहर थोटे, शीतल राम पांदे या सर्वांनी संगनमताने शारीरिक व मानसिक छळ केला.

तसेच वेळोवेळी उपाशी ठेवले, शिवीगाळ करत, चापट-बुक्क्याने मारहाण करून, जिवे मारण्याची धमकीदिली.विवाहितेच्या या तक्रारीवरून कन्नड ग्रामीण पोलिस ठाण्यात वरील ९ लोकांविरुद्ध कलम ४९८ (अ ),३२३, ५०४, ५०६ (३४) नुसार गुन्हा दाखल करण्यात आला असून, सहायक पोलिस निरीक्षक तात्याराव भालेराव यांच्या मार्गदर्शनाखाली पोलिस हेडकॉन्स्टेबल एस. बी. बोराडे पुढील तपास करीत आहेत.