लासुर स्टेशन (औरंगाबाद): औरंगाबादहून नागपूर-मुंबई महामार्गाने जाणाऱ्या दुचाकीचा अज्ञात वाहनाशी झालेल्या अपघातात मोटरसायकलवरील दोघांचा जागीच मृत्यू झाला. तर एका गंभीर जखमीचा उपचारादरम्यान मृत्यू झाला आहे. ही घटना गुरुवारी (ता.12) मध्यरात्री वसुसायगावजवळ घडली. गणेश बाळू जाधव (वय38) आणि नितीन अंबादास जाधव (वय28 ) दोघे (राहणार शिल्लेगाव ता.गंगापूर) हे दोघेजण घटनास्थळीच जागीच ठार झाले. तर गणेश तुकाराम जाधव (वय26) या गंभीर जखमीचा शुक्रवारी (ता.13) उपचारादरम्यान मृत्यू झाला.

अज्ञात वाहनाच्या अपघातात मयत झालेले तिघे शिल्लेगाव येथील रहिवासी असल्याने गावावर शोककळा पसरली आहे. दुचाकीवरील तिघांचाही मृत्य झाल्याने अपघात नेमका कसा झाला हे समजणे कठीण झाले आहे. घटनेची माहिती कळताच शिल्लेगावचे पोलिस निरीक्षक रवींद्र खांडेकर यांनी कर्मचाऱ्यांसह घटनास्थळी धाव घेतली. ठार झालेल्या दोघांना लासुर स्टेशन येथील प्राथमिक आरोग्य केंद्रात पाठवले होते तर गंभीर जखमी असलेल्या गणेशला पुढील उपचारासाठी औरंगाबाद येथे हलविले होते. मात्र शुक्रवारी उपचारादरम्यान गणेशचाही मृत्यू झाला त्यामुळे शिल्लेगावात या दुर्घटनेबद्दल हळहळ व्यक्त करण्यात येत आहे.

पोलिसांकडून मिळालेल्या माहितीनुसार शिल्लेगाव येथील तिघे त्यांच्याकडील मोटरसायकलने औरंगाबादकडून घराकडे शिल्लेगावला जात असतानी नागपूर-मुंबई मार्गावरील वसुसायगाव जवळ कोणत्यातरी एका भरधाव अज्ञात वाहनाच्या दुचाकीशी अपघात होऊन दुचाकीवरील दोघांच्या डोक्याला जास्त मार लागल्याने जागीच मृत्यू झाला होता. तर एक जण गंभीर जखमी झाल्याने त्याला पुढील उपचारासाठी पोलिसांनी औरंगाबाद येथे हलविले होते. सदरील घटना गुरुवारी मध्यरात्रीच्या सुमारास घडलेली आहे, अशी माहिती शिल्लेगाव पोलिसांनी दिली आहे. शवविच्छेदनानंतर शुक्रवारी या तिघांवर शिल्लेगाव येथील स्मशानभूमीत अंत्यसंस्कार करण्यात आले. शिल्लेगाव पोलिस ठाण्यात गुन्हा दाखल झाला असून अपघाताचा अधिक तपास पोलिस निरीक्षक रवींद्र खांडेकर करीत आहेत.