औरंगाबाद : शहरात पुन्हा एकदा कोरोना डोके वर काढतोय. गेल्या चार दिवसात पंधरा करोनाबाधित शहरात आढळून आले आहेत. त्यामुळे महापालिकेने चाचणी केंद्रांची संख्या वाढवली आहे. मुंबई, पुण्यापाठोपाठ आता औरंगाबादमध्ये देखील करोनाबाधितांची संख्या वाढत आहे. गेल्या आठवड्यात एकाच दिवसात चार बाधित आढळून आले होते. त्यानंतर तीन-चार दिवस रुग्ण आढळून आले नाहीत. पण सहा जूनपासून पुन्हा रुग्ण आढळून येत आहेत.

पाच जूनला दोन रुग्ण आढळन आले. सहा जूनला पाच रुग्ण आढळून आले, त्यापैकी चार रुग्ण १८ ते ५० या वयोगटातील असून एक रुग्ण पन्नास वर्षावरील गटातील आहे. आठ जूनला चार रुग्ण आढळले. त्यापैकी दोन रुग्ण १८ ते ५० या वयोगटातील तर दोन रुग्ण पन्नास वर्षावरील गटातील आहेत. तसेच नऊ जूनला चार रुग्ण आढळून आले. त्यापैकी दोन रुग्ण १८ ते ५० वयोगटातील तर दोन रुग्ण पन्नास वर्षावरील वयोगटातील आहेत, असे महापालिकेतर्फे सांगण्यात आले. वाढत्या रुग्णसंख्येमुळे महापालिकेच्या आरोग्य विभागाने कोरोना चाचणी केंद्रात वाढ केली आहे.

सध्या नऊ ठिकाणी नवीन केंद्र सुरु केले आहेत. छावणी आरोग्य केंद्र, सिडको एन- ११ आरोग्य केंद्र, सिडको एन- ८ आरोग्य केंद्र, कैसर कॉलनी दवाखाना, घाटी रुग्णालयाची मेडिसीन विभागाची इमारत, सिडको एन- २ कम्युनिटी सेंटर, पदमपुरा कोविड केअर सेंटर, मेल्ट्रॉन हॉस्पिटल, विमानतळ या ठिकाणी कोरोना चाचणी केंद्र सुरु करण्यात आले असल्याचे सांगण्यात आले.