औरंगाबाद : औरंगाबादमध्ये भाजपाकडून जलआक्रोश मोर्चाचे आयोजन करण्यात आलं आहे. आज हा मोर्चा होणार होता पण त्यापूर्वीच भाजपाच्या मोर्चाचे बॅनर फाडण्यात आले आहेत. देवेंद्र फडणवीस (Devendra Fadnavis) यांच्या नेतृत्वाखाली हा मोर्चा होणार असून या मोर्चामध्ये भाजपचे रावसाहेब दानवे आणि भागवत कराड हेही सहभागी होणार आहेत.

औरंगाबादमधील पैठण गेट ते महानगरपालिका कार्यालयापर्यंत हा मोर्चा काढला जाणार आहे. औरंगाबाद शहराच्या पाणी प्रश्नाबाबत हा मोर्चा भाजपाकडून काढण्यात येत आहे. दरम्यान याआधी पडेगाव परिसरात भाजपाचे बॅनर फाडण्यात आले आहेत.

औरंगाबादमधील पैठण गेट परिसरात भाजपाने आपल्या मोर्चाचे बॅनर लावले होते. त्याशेजारीच शिवसेनेने आपले बॅनर लावल्याने या दोन पक्षात बॅनर वॉर आपल्याला पाहायला मिळालं. दरम्यान पडेगाव परिसरात अज्ञातांनी भाजपाच्या मोर्चाचे बॅनर फाडले होते. त्यानंतर काही वेळ तणावाचे वातावरण निर्माण झाले होते. भाजपाच्या कार्यकर्त्यांनी अज्ञातावर गुन्हा दाखल करण्याची मागणी केली होती.

दरम्यान भाजपाने आपल्या मोर्चाच्या बॅनरमध्ये महाविकास आघाडीला राक्षस असं संबोधलं आहे. आज दुपारी साडेचार वाजेच्या सुमारास हा मोर्चा सुरू होणार असून सायंकाळी सात वाजेच्या सुमारास हा मोर्चा महानगरपालिका कार्यालयापर्यंत पोहोचेल. विरोधीपक्षनेते देवेंद्र फडणवीस या मोर्चाचे प्रमुख असून रावसाहेब दानवे, भागवत कराड हेसुद्धा यामध्ये सहभागी असणार आहेत.

औरंगाबादमध्ये आठवड्यातील फक्त एक दिवस पाणी येत असल्याने नागरिकांना पाण्याच्या प्रश्नाला सामोरं जावं लागत आहे. औरंगाबादकरांसाठी १६०० कोटी रूपयांची पाणी योजना सरकारने सत्तेच्या शेवटी दिली असल्याचा आरोप शिवसेना भाजपावर करत आहे. त्यामुळे शिवसेना - भाजपा वाद शिगेला पोहोचला आहे.