औरंगाबाद: शहरातील कोरोना संसर्ग रोखण्यासाठी लसीकरणासोबत आता जास्तीत जास्त चाचण्या करण्याचा निर्णय महापालिकेने घेतला आहे. जुन्या पथकांसोबत आता आणखी सहा मोबाइल टीम, सहा कन्टेनमेंट झोन टीम व सिटी एन्ट्री पॉइंटवर सहा पथके तैनात केली जाणार आहेत. एकूण ५४ पथकांमार्फत अधिकाधिक जणांच्या चाचण्या केल्या जाणार असल्याचे महापालिकेचे प्रशासक आस्तिककुमार पांडेय यांनी बुधवारी (ता. १७) सांगितले.

फेसबुक लाइव्हच्या माध्यमातून नागरिकांसोबत संवाद साधताना श्री. पांडेय म्हणाले, की कोरोना संसर्ग वाढल्यानंतर शहरात दहा मोबाइल टीम आणि २४ तपासणी केंद्रांवर चाचणी केली जात आहे. त्यासोबत आणखी सहा मोबाइल टीम, कंटेनमेंट झोनसाठी सहा टीम आणि शहराच्या एन्ट्री पॉइंटवर सहा ठिकाणी सहा टीम अशा एकूण ५४ टीम आता स्वॅब घेतील.

Hatnur Toll Plaza: हतनूर टोल अखेर सुरू, स्थानिकांना 275 मासिक टोल

कंन्टेनमेंट झोनबाबत श्री. पांडेय म्हणाले, की गेल्यावर्षीच्या तुलनेत कन्टेनमेंट झोनचे निकष यावेळी बदलले आहेत. आढळून येणारे रुग्ण दाट वस्तीत नाहीत. त्यामुळे आता २० पेक्षा अधिक रूग्ण आढळल्यास वसाहत सील केली जाणार नाही. मात्र, त्या वसाहतीत पोस्टर्स व बॅनर लावले जातील. जेणेकरून नागरिकांना हा भाग कोरोनासाठी रेड झोन असल्याचे कळेल.

या भागातील एका व्यक्‍तीला स्वयंसेवक म्हणून देखरेखीसाठी नियुक्‍त केले जाईल. तसेच आशा स्वयंसेविका, शिक्षक या भागात जाऊन दररोज पाहणी करतील. तसेच चाचण्यांसाठी नोडल ऑफिसर म्हणूनही तेच काम पाहतील. त्यानंतर पाहणी अहवाल ते वॉररूमला देतील.

काय म्हणता मांजऱ्या साप! हो औरंगाबादच्या रायपूर शिवारात आढळला दुर्मिळ साप

वीस शहर बस दाखल 
कोरोनाबाधित व्यक्ती स्वतःच्या वाहनाने कोविड केअर सेंटरमध्ये जातात. आता पॉझिटिव्ह आलेल्या रुग्णांच्या वाहतुकीसाठी व पथकांसाठी २० स्मार्ट बसची व्यवस्था करण्यात आली आहे. या बससोबतच आणखी १० नवीन अ‍ॅम्ब्युलन्स सुरू करणार असल्याचे श्री. पांडेय यांनी सांगितले.