खुलताबाद (औरंगाबाद): तालुक्याची ऐतिहासिक, धार्मिक अन् पर्यटन महत्त्व पाहता येथे वर्षभर भाविकांसह पर्यटकांची वर्दळ असते. यात वाहनांच्या पार्किंगमधून वेरूळ, खुलताबाद येथे लाखोंची उलाढाल होत असते. परंतु, कोरोनामुळे गत वर्षभरापासून येथे येणाऱ्यांच्या संख्येत मोठी घट झाली आहे. याचा परिणाम लाखो रुपयांच्या उलाढालीवर झाला आहे. असे असले तरी येथे वाहनांमुळे होणाऱ्या प्रदूषणात मोठी घट झाली आहे.

वेरूळ लेणी, घृष्णेश्वर मंदिरासमोर व खुलताबाद येथील भद्रा मारुती संस्थानअंतर्गत पे पार्किंगची सुविधा आहे. वेरूळ येथील जग प्रसिद्ध लेणी, १२ वे ज्योतिर्लिंग श्री. घृष्णेश्वर, तसेच खुलताबाद येथील भद्रा मारुतीच्या दर्शनासाठी भाविक, पर्यटक येतात. वेरूळ येथे पावसाळ्यात अन् श्रावण महिन्यात पर्यटकांच्या वाहनांची मोठी वर्दळ असते. नेहमी वाहनतळांबरोबरच इतर मोकळ्या जागांचेही वाहनतळात रूपांतर होत असते. हीच परिस्थिती खुलताबादलाही असते.

परंतु, यंदा पर्यटकांनी पर्यटन स्थळांकडे पाठ फिरवली आहे. याचा पर्यटन क्षेत्रावर मोठा परिणाम जाणवत आहे. शिवाय नेहमी हाउसफुल दिसणारी वाहनतळ यंदा मैदानसदृश अवस्थेत दिसून येत आहेत. वेरूळ लेणी, घृष्णेश्वर मंदिर, भद्रा मारुती येथील वाहनतळाच्या वसुलीचा वार्षिक लिलाव केला जातो. यातून पार्किंग चालविणाऱ्याकडून एक रकमी पैसे घेतले जातात. सध्या वेरूळ लेणी/घृष्णेश्वर मंदिर येथे चारचाकी वाहनांसाठी ५० रुपये, दुचाकी- २० रुपये, लक्झरी- ७० रुपये तर भद्रा मारुती मंदिर येथे चारचाकी- ५०, दुचाकी-२० तर लक्झरीसाठी ७० रुपये पार्किंगचा दर आहे.

बाजाराच्या दिवशी वाहतूक कोंडी- 
खुलताबाद तालुक्यातील वेरूळ, गल्लेबोरगाव, सुलतानपूर, बाजारसावंगी या गावांमध्ये ग्रामपंचायतीतर्फे कोणत्याही वाहनांसाठी पार्किंगची सोय करण्यात आलेली नाही. त्यामुळे या गावांमध्ये आठवडी बाजाराच्या दिवशी पार्किंगचा मोठा प्रश्न उद्भवतो. मोकळ्या जागेवर वाहनधारक वाहनांची पार्किंग करतात. याचा बाजारकरूंना मोठा त्रास सहन करावा लागतो.