औरंगाबाद : राज्य शासनाने गावांसह शहरे, वस्त्या व रस्त्यांची जातिवाचक नावे बदलण्याचा निर्णय घेतला आहे. त्यानुसार शहरातील ५० वसाहतींची नावे बदलली जाणार आहेत. नव्या नावासाठी संबंधित भागातूनच नावे मागविण्यात येतील, असे महापालिकेच्या उपायुक्त अपर्णा थेटे यांनी सांगितले. जातीवाचक नावामुळे समाजात तेढ निर्माण होऊन संघर्ष होत असल्याचे निदर्शनास आल्याने शासनाने अशी नावे बदलण्याचे आदेश काढले आहेत.

त्यानुसार प्रशासक तथा आयुक्त आस्तिककुमार पांडेय यांनी शहरातील वसाहती व रस्त्यांची जातिवाचक नावे शोधून ते बदलण्याची जबाबदारी उपायुक्त अपर्णा थेटे यांच्यावर सोपविली आहे. या संदर्भात श्रीमती थेटे यांनी सांगितले की, शहरातील जातिवाचक वसाहती व रस्त्याची नावे शोधण्यासाठी वॉर्ड अधिकाऱ्यांना कळविण्यात आले होते. वॉर्ड अधिकाऱ्यांनी नावे कळवली असून, आता वॉर्डातील नागरिकांकडून नावे मागवली जाणार आहेत. ही नावे प्राप्त झाल्यानंतर जाहीर प्रगटनाव्दारे नावांना प्रसिध्दी दिली जाईल, असे त्यांनी सांगितले.

अशी आहेत नावे

प्रभाग एक

डिंबर गल्ली, ब्राम्हण गल्ली, कुंभार गल्ली, मल्लावपुरा, बेगमपूरा, भिल्ल गल्ली, भिमनगर, भंगीवाडा, मांगवाडा (भावसिंगपुरा गाव), चांभारवाडा (भिमनगर, भावसिंगपूरा गाव), बौध्दवाडा, मोमीनपुरा, लोटाकारंजा, माळीवाडा (बारुदगर नाला).

प्रभाग दोन

धोबीघाट (काचीवाडा), नवाबपुरामधील तेलंगवाडा गवळीपूरा, राजाबाजारमधील बोहरी कठडा, गुलमंडीमधील जोहरीवाडा, कुंभारवाडा, रंगारगल्ली, नागेश्वरवाडीतील पारधीपुरा भोईवाडा, औरंगपुऱ्यातील बौद्धवाडा (पैठणगेट), सिल्लेखान्यातील कैकाडीवाडा, समर्थनगरातील भोईवाडा.

प्रभाग चार

मयूरपार्क भागातील गोंधळवाडा, हर्सूल प्रभागातील धनगर गल्ली, सोनार गल्ली, ब्राम्हण गल्ली, मांगवाडा, कैकाडी गल्ली, चांभार गल्ली, एकतानगरातील चांभार गल्ली, कोळीवाडा, सोनार गल्ली.

प्रभाग पाच

नारेगावातील भाटनगर, पटेलनगर, चौधरी कॉलनीतील शहानगर, पटेलनगर.

प्रभाग सहा

चिकलठाण्याच्या कामगार कॉलनीतील खाटीक गल्ली (कुरेशी गल्ली) धनगरवाडा, साठेनगर (मांगवाडा) बौध्दवाडा, सुतार वाडा, माळी गल्ली, कुंभारवाडा, तेलीगल्ली, मुल्लागल्ली, ब्राम्हण गल्ली, चांभारवाडा.

प्रभाग सात

बौध्दवाडा (गोधडीपूरा), भारतनगरातील वैदुवाडा (वैदू मंदिर).

प्रभाग नऊ- बौध्दनगर.