औरंगाबाद: प्राध्यापक महिलेला ‘माझ्यासोबत रहा’ म्हणून वांरवार त्रास देत, तिचा रस्ता अडवून हात धरत विनयभंग करणाऱ्या प्राध्यपकाला प्रथमवर्ग न्यायदंडाधिकारी यांनी ठोठाविलेली शिक्षा प्रधान जिल्हा न्यायाधीश श्रीपाद टेकाळे यांनी कायम केली. नीरज अण्णासाहेब साळुंके (३९, रा. तीरुपती सुप्रीम इव्हेंट, जालाननगर) असे आरोपी प्राध्यापकाचे नाव आहे.
प्रकरणात एका प्राध्यापक महिलेने फिर्याद दिली होती. त्यानूसार, १२ ऑगस्ट २०११ रोजी दुपारी अडीच वाजेच्या सुमारास फिर्यादी महिला प्राध्यापक या कर्तव्यावर असतांना आरोपी नीरज तेथे आला. त्याने फिर्यादीला ‘तु माझ्यासोबत रहा’ असे म्हणत असा तगादा लावला. ही घटना घडण्यापूर्वी वर्षभरापासून आरोपी हा फिर्यादी प्राध्यापिकेला त्रास देत होता. फिर्यादी ही एकदिवस रस्त्याने जात असतांना आरोपीने तिला अडवून तिचा हात पकडला व तिला लज्जा वाटेल असे कृत्य करुन तिचा विनयभंग केला.
तसेच पोलिसांत तक्रार केल्यास जीवे मारण्याची देखील धमकी दिली. प्रकरणात बेगमपूरा पोलीस ठाण्यात गुन्हा दाखल करण्यात आला होता. गुन्ह्यात २३ ऑगस्ट २०१३ रोजी तत्कालीन प्रथमवर्ग न्यायदंडाधिकारी मीना पाटील यांनी आरोपीला नीरज याला दोषी ठरवून भादंवि कलम ५०६ अन्वये १५ दिवस कारावास व ३०० रुपये दंड, कलम ३५४ अन्वये दोन महिने कारावास आणि ३०० रुपये दंडाची शिक्षा ठोठाविली होती.
तसेच दंडाची रक्कम ही फिर्यादीला नुकसान भरपाई म्हणून देण्याचे आदेश दिले होते. या आदेशाला नीरज याने जिल्हा व सत्र न्यायालयात आव्हान दिले असता प्रधान जिल्हा न्यायाधीश श्रीपाद टेकाळे यांनी कलम ५०६ अन्वये दिलेली शिक्षा रद्द केली तर कलम ३५४ अन्वये ठोठाविलेली शिक्षा कायम ठेवली. प्रकरणात सहायक लोकाभियोक्ता विनोद कोटेचा यांनी काम पाहिले.
(edited by- pramod sarawale)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.