औरंगाबाद : जागतिक मेंदू पक्षाघात (सेरेब्रल पालसी) दिवस आनंददायी व्हावा, म्हणून पोद्दार इंटरनॅशनल स्कूल वाळूजतर्फे विहंग विशेष गुरुवारी मुलांसाठी विविध कार्यक्रम घेण्यात आले.

सर्व समावेशी समाज उभा करायचा असेल तर मुलांना एकत्र आणणे जरुरी आहे. सामान्य मुलांनी दिव्यांग मुलांबरोबर हात पकडून जेव्हा फेरा धरला तेव्हा समावेशी समाज शक्य आहे असेच वाटले. यावेळी पोदारच्या विद्यार्थ्यांना सेरेब्रल पालसी म्हणजे काय? त्यांचा अभ्यासक्रम कसा असतो? त्यांना कोणत्या थेरपीची गरज असते? याविषयी माहिती देण्यात आली.

प्रसंगी पोद्दारमधील सामान्य मुलांनी दिव्यांग मुलांसोबत विविध खेळांचा आनंद घेतला. डॉ.मंगेश कदम यांनी विशेष मुलांच्या पालकांची सभा घेऊन वयात येणाऱ्या मुलामुलींच्या समस्यांबाबत मार्गदर्शन केले. मुले वयात येत असताना गुड टच, बॅड टच’, सोशल डिस्टन्सिंग विषयी पटवून द्यावे. मुलांच्या सवयीची डायरी लिहून ठेवावी. मुलांशी संवाद साधताना त्यांचे शारीरिक वय लक्षात घेता योग्य शब्दांचा वापर करावा. मुलांच्या लैंगिक समस्या काय असतात, त्यावरील उपाय काय आहेत, याबाबत योग्य मार्गदर्शन डॉ. कदम यांनी केले. यासाठी दिशा पाटील, अपर्णा वैद्य यांनी मेहनत घेतली.

सावित्रीबाई फुले महिला एकात्म समाज मंडळातर्फे ग्रामीण भागात चालवल्या जाणाऱ्या संजीवनी ग्रामीण आरोग्य प्रकल्पाच्या माध्यमातून ७४ गावांमधील आशा कार्यकर्त्यांना नॅशनल सेरेब्रल पालसी म्हणजे काय? त्याची लक्षणे व त्यावरील उपचार यासंबंधी पेडियात्रिक न्यूरोलॉजिस्ट डॉ. वर्षा वैद्य यांनी मार्गदर्शन केले. आदिती शार्दूल यांनी बहुविकलांग मुलांना समाजात कशा पद्धतीने मदत करू शकतो, याबाबत प्रात्यक्षिकांसह सादरीकरण केले. त्याचबरोबर बहू विकलांग मुलांसाठी वैद्यकीय प्रमाणपत्र, विविध शासकीय योजना आदींविषयी माहिती दिली.