वाळूजमहानगर : वाळूज औद्योगिक वसाहतीतील सपना मॅट कंपनीत नविन शेड उभारण्यासाठी सुमारे पन्नास ते साठ वर्ष जुनी व पाच ते सहा झाडांची कत्तल गुरूवारी करण्यात आली. ही झाडे एमआयडीसी कार्यालयाच्या परवानगीने तोडण्यात आल्याचा दावा कंपनीने केला आहे.

वाळूज औद्योगिक वसाहतीतील सपना मॅट कंपनीत नविन शेड उभारणीचे काम सुरू असून त्यासाठी कंपनीच्या आवारात असलेले सुमारे पन्नास ते साठ वर्ष जुनी झाडे तोडण्यात येत आहे. शिवाय तोडलेल्या झाडांची वाहतूक देखील करण्यात येत आहे. ही झाडे एमआयडीसीच्या परवानगीने तोडली जात असल्याचा दावा कंपनीने केला असला तरी या झाडांच्या कत्तलीमुळे प्रदूषण होण्याची शक्यता असल्याने वृक्षप्रेमींनी नाराजी व्यक्त केली आहे.

एकीकडे वृक्ष लागवडीसाठी आणि संवर्धनासाठी शासन लाखो करोडो रुपये खर्च करते. मात्र वाळूज औद्योगिक वसाहतीत परवानगी किंवा विनापरवानगी बेसुमार वृक्षतोड होत आहे.

दिवसेंदिवस हवेतील ऑक्सिजनचे प्रमाण कमी होत असल्याने वृक्ष लागवड आणि संवर्धन ही आजची गरज आहे. त्यामुळे या वृक्षतोडीला आळा घालण्याची मागणीही वृक्षप्रेमींसह कामगार व नागरिकांकडून केली जात आहे. तसेच यापुढे वृक्ष तोडणार्यांवर कडक कारवाई करण्यात यावी. अशी मागणीही करण्यात येत आहे.