गंगापूर : गंगापूर तालुक्यात जुलै-ऑगस्ट महिन्यात झालेल्या अतिवृष्टी मुळे शेती पिकांचे मोठे नुकसान झाले होते. या भरपाई पोटी गंगापूर तालुक्याला १० कोटी ९२ लाख रुपये मंजूर झाले असून विशेष म्हणजे दिवाळीपूर्वीच शेतकऱ्यांना मदत मिळणार आहे.

तालुक्यात जुलै महिन्यात अतिवृष्टी झाली होती. या अतिवृष्टीमुळे शेतकऱ्यांच्या सोयाबीन, कापूस व अन्य पिकांचे मोठे नुकसान झाले होते. तसेच शंख गोगलगायीमुळे देखील पिके फस्त झाली होती. त्यावेळी आमदार बंब यांनी अतिवृष्टीग्रस्त गावांचा दौरा करून नुकसानीची पाहणी केली होती. तसेच आर्थिक मदत द्यावी अशी मागणी करून राष्ट्रीय आपत्ती निवारण मदत निधीच्या निकषात बदल करण्याची मागणी त्यांनी केली होती.

या मागणीची दखल घेत जिल्हा प्रशासनाने राज्य सरकारकडे प्रस्ताव पाठवला होता. त्या प्रस्तावानुसार राज्य शासनाच्या निधीमधून गंगापूर तालुक्याला विशेष बाब म्हणून बाधित शेतकऱ्यांना वाढीव दराने मदत जाहीर झाली आहे. यात जिरायती पिकांच्या नुकसानीसाठी १३ हजार ६०० रुपये प्रति हेक्टर, बागायती पिकांच्या नुकसानीसाठी २७ हजार रुपये, बहुवार्षिक पिकांच्या नुकसानीसाठी ३६ हजार रुपये याप्रमाणे वाढीव मदत मिळणार आहे.

यामध्ये गंगापूर तालुक्‍यातील नऊ हजार ४८ शेतकऱ्यांना १० कोटी ९२ लाख रुपयांची मदत मिळणार आहे. याविषयी जिल्हाधिकाऱ्यांनी तहसीलदार सतीश सोनी यांना निधी वितरित करून आदेश काढले आहेत.

आ.प्रशांत बंब यांच्या मागणीला यश

आमदार बंब यांनी अतिवृष्टीग्रस्त गावांचा दौरा करून नुकसानीची पाहणी केली होती. तसेच आर्थिक मदत द्यावी अशी मागणी करून राष्ट्रीय आपत्ती निवारण मदत निधीच्या निकषात बदल करण्याची मागणी त्यांनी केली होती. या मागणीची दखल घेत जिल्हा प्रशासनाने राज्य सरकारकडे प्रस्ताव पाठवला होता.

खुलताबादला ६ कोटी ५८ लाखांचा निधी

नुकसान भरपाई पोटी गंगापूर तालुक्याप्रमाणेच खुलताबाद तालुक्यातही ६ कोटी ५८ लाख रुपयांचा निधी मंजूर झाला आहे. दिवाळीपूर्वीच शेतकऱ्यांच्या खात्यात रक्कम जमा होणार असल्याने शेतकऱ्यांत समाधानाचे वातावरण आहे.