औरंगाबाद : जिल्हा परिषदेचे सीईओ तथा प्रशासक नीलेश गटणे यांचे नाव व फोटो वापरून अनोळखी व्यक्तीने गुगल पेद्वारे लोकांकडून पैशांची मागणी करत असल्याचे समोर आले आहे.या प्रकारानंतर त्यांनी पोलिस आयुक्तालयातील सायबर क्राईम शाखेत तक्रार केली आहे. असे एसएमएस आल्यावर कुणालाही पैसे पाठवू नका, असे आवाहन नीलेश गटणे यांनी केले. सायबर भामट्याकडून लोकांच्या फसवणुकीच्या अनेक घटना वारंवार उघडकीस येत आहेत. असाच प्रकार सीईओ नीलेश गटणे यांच्यासोबत घडला आहे.

त्यांनी सांगितले की, सायबर भामट्याने ८४१४९७००६२ हा मोबाईल क्रमांक माझे नाव, व व्हॉट्सॲप प्रोफाईलवरील फोटो वापरला आहे. हा भामटा माझ्या परिचयातील लोकांना गुगल पेवरून पैसे पाठविण्याची मागणी करीत आहे. मी सध्या अडचणीत आहे, मला २ हजार रुपये पाठवा, चार हजार रुपये पाठवा.. असे गुगल पेवरून त्यांना एसएमएस पाठवीत आहे.

सर तुम्हाला काही अडचण आहे का, पैसे पाठवू का, अशी विचारणा करत, काहींनी मला फोन करून केला. त्यामुळे हा प्रकार मला समजला. त्यांच्याकडे नंबरबाबत चौकशी केली असता, सदर नंबर माझा नसल्याचे दिसून आले. त्यानंतर याबाबत मी सायबर क्राईमकडे तक्रार नोंदविली आहे.हा प्रकार खूप धक्कादायक आहे. मोबाईलमध्ये नंबर सेव्ह असल्याने कुणालाही संबंधितांचे नंबर पाठ नाहीत. आपण फक्त नाव, फोटो पाहतो, अशा प्रकारच्या गुगल पे वरील मेसेजला कुणीही प्रतिसाद देऊ नये.

-नीलेश गटणे, सीईओ तथा प्रशासक.