अजिंठा : महामार्गावरून गुटख्याची वाहतूक करणारा टेम्पो अजिंठा पोलिसांनी मंगळवारी (ता. १४) रात्रीच्या सुमारास सापळा रचून पकडला. सुमारे २० लाखांच्या गुटख्यासह १५ लाखांचा टेम्पो असा एकूण सुमारे ३५ लाखांचा मुद्देमाल पोलिसांनी हस्तगत केला आहे.

सहाय्यक पोलीस निरीक्षक प्रमोद भिंगारे यांनी नुकताच अजिंठा पोलीस ठाण्याचा पदभार स्वीकारताच अवैध धंद्यांविरुद्ध कार्यवाही केल्याने अवैध धंदेवाल्यांचे धाबे दणाणले आहेत. औरंगाबाद-जळगाव महामार्गावरून चार चाकी वाहनातून गुटख्याची वाहतूक होणार असल्याची गोपनीय माहिती

पोलिसांना मिळताच सहाय्यक पोलीस निरीक्षक प्रमोद भिंगारे, उपनिरीक्षक राजू राठोड, पोलिस हेड कॉस्टेबल अक्रम पठाण, संजय कोळी, विकास चौधरी, अरुण गाडेकर, निलेश शिरस्कर, प्रभाकर जाधव आदींनी एका हॉटेलजवळ रात्रीच्या सुमारास सापळा रचला. यावेळी महामार्गावरून जात असलेला टेंपो

(क्र ः एम. एच. २१ बीच ४७३५) अडवून पाहणी केली असता त्यात १९ लाख ८६ हजार ८०० रुपयांचा गुटखा आढळला. चालक गजानन अंबादास लोखंडे (रा.तपोवन ता.भोकरदन,जिल्हा जालना), अण्णा गजानन जगताप (रा.राजूर ता.भोकरदन), अमोल प्रभाकर तुपे (रा.उंबरखेडा ता.भोकरदन) या तिघांविरुध्द अजिंठा पोलिसात गुन्हा दाखल करून अटक करण्यात आली.