औरंगाबाद : कोका-कोला कंपनीचा सीईओ असल्याची बतावणी करून महिलेसोबत सोशल मीडियावर मैत्री केली. त्यानंतर लंडन येथून भारतात येणार असल्याची थाप मारून विमानतळावर दीड लाख ब्रिटिश पौंड अडकल्याचे सांगत महिलेला सोशल मीडियावरील भामट्याने सुमारे एक लाख रुपयांचा गंडा घातला. हा प्रकार २६ नोव्हेंबर ते १ डिसेंबर २०२१ या काळात घडला. याप्रकरणी महिलेच्या तक्रारीवरून केल्वीन विल्यम्स (रा.लंडन) आणि निता दास (रा. दिल्ली) या भामट्यांविरुद्ध हर्सूल पोलीस ठाण्यात गुन्हा दाखल करण्यात आला.

जिनोबिया मोहम्मद फारूख पटेल (३७, रा. मोहम्मद मस्जिद जवळ, लेन-१, बेरी बाग, हर्सुल) यांच्याशी सोशल मिडीयावर केल्वीन विल्यम्स नावाच्या प्रोफाईलवरून फ्रेंड रिक्वेस्ट आली. तेव्हा त्याने स्वतःला कोका-कोला कंपनीचा सीईओ असल्याचे सांगून युनाईटेड किंगडम (लंडन) येथील लायसेस्टर शहराचा रहिवाशी आहे असे सांगितले. तसेच त्याला जेनिफर नावाची मुलगी सुध्दा आहे अशी थाप मारली. त्यानंतर दोघांमध्ये अनेकवेळा संदेश देवाणघेवाण होत राहिली. त्यामुळे पुढे परिचय आणखी वाढत गेला. पुढे त्याने २९ नोव्हेंबर २०२१ रोजी भारतात येणार असल्याचे सांगून तिकिटाचा फोटो जिनेबिया यांच्या व्हॉट्सऍपवर पाठवला. त्यानंतर केल्विन विल्यम्स व नीता दास या दोघांनी जिनोबिया यांना फोन केला. त्यावेळी त्यांनी दिल्ली विमानतळावर दीड लाख ब्रिटिश पौंड सोबत आणले होते.

मात्र ते पकडले गेले आहेत. त्यामुळे ते सोडवून घेण्यासाठी टॅक्स क्लियर करावा लागेल. त्यासाठी निता दास हिच्या बँक खात्यावर ५५ हजार रुपये पाठवण्यास जिनोबिया यांना सांगितले. जिनोबिया यांचा विश्वास अगोदरच विल्यम्सने संपादन केलेला असल्याने जिनोबिया यांनी त्याला आरटीजीएसद्वारे पैसे पाठवले. मात्र, १ डिसेंबर २०२१ रोजी पुन्हा विल्यम्स आणि नीता दास यांनी जिनोबिया यांना फोन केला. त्यावेळी टॅक्स क्लियरेनसाठी मदत केल्याने खोट्या मनी लॉन्डरिंगच्या गुन्ह्यात अडकवण्याची जिनोबिया यांना धमकी दिली. घाबरून जिनोबिया यांनी दास हिच्या बँक खात्यावर पुन्हा ४२ हजार ८०० रुपये पाठवले. मात्र, त्यानंतर त्या दोन्ही भामट्यांचा संपर्क होत नसल्याने जिनोबिया यांनी हर्सूल पोलीसात धाव घेत ९७ हजारांची फसवणूक झाल्याची तक्रार दिली.