औरंगाबाद : एकीकडे कोरोना संसर्ग कमी करण्यात महापालिकेची संपूर्ण यंत्रणा कामाला लागलेली असताना आता बन्सीलालनगरात दोन दिवसांत सात ते आठ कुत्र्यांच्या मृत्यू झाल्याचे समोर आले आहे. मंगळवारी (ता. २३) दोन कुत्र्यांचा मृतदेह खडकेश्वर येथील रुग्णालयात नेऊन त्यांचे पोस्टमॉर्टम केले. त्याचा अहवाल आज बुधवारी (ता. २४) मिळणार आहे.

शहरातील बन्सीलालनगर भागात दोन-तीन दिवसांपासून भटके कुत्रे मृत अवस्थेत सापडत आहेत. पण हे कुत्रे कशामुळे मरताताहेत याचे कारण अद्याप समोर आलेले नाही. माजी महापौर गजानन बारवाल यांनी महापालिकेच्या अधिकाऱ्यांना याबाबत माहिती कळविली. त्यानंतर मुख्य पशुसंवर्धन अधिकारी डॉ. बी. एस. नाईकवाडे यांनी पशुसंवर्धन विभागाचे पथक घटनास्थळी पाठविले. त्यानंतर कुत्र्यांचे पोस्टमॉटर्म करण्याचा निर्णय घेण्यात आला. पशुसंवर्धन अधिकारी डॉ. शाहेद शेख, लाइफ केअर ॲनिमल वेलफेअर असोसिएशनचे सचिव जयेश शिंदे, राहुल लोधे यांनी दोन मृत कुत्रे खडकेश्वर येथील रुग्णालयात नेले व पोस्टमॉर्टम करण्यात आले.

संपादन - गणेश पिटेकर