औरंगाबाद: कोरोनाचा संसर्ग वाढत आहे. त्यात बाधितांमध्ये बालकांचे वाढते प्रमाण काळजीत टाकणारे आहे. गेल्या आठ दिवसांत शहरात ७४ बालकांना कोरोनाची लागण झाली आहे. तर दोन बालकांचा मृत्यू झाला आहे. दुसरीकडे शहरात रस्त्यांवर फिरणारा तरुणवर्ग अधिक असून, एकूण बांधितांमध्ये त्यांचे प्रमाण ५० टक्क्यापर्यंत पोचले आहे.

शहरात गेल्या काही दिवसांपासून कोरोना रूग्णांची संख्या गतीने वाढत आहे. दररोज हजारपेक्षा अधिक रूग्ण सापडत आहेत तर दुसरीकडे उपलब्ध आरोग्य सुविधा अपुरी पडत आहे. यातच आरोग्य तज्ज्ञांनी शहरात कोरोनाचा नवीन स्टेन सुरू झाल्याचे स्पष्ट केले आहे. यात बालकांनाही कोरोनाची लागण होत असल्याने चिंता व्यक्त केली आहे. गेल्या १५ दिवसांत कोरोना बाधितांतून बालकांचाही मृत्यू झाल्याच्या घटना घडल्या आहेत.

धक्कादायक! पत्नी, तीन महिन्याच्या मुलीला सोडून जावयाची सासुरवाडीत गळफास घेऊन...

जिल्ह्यात झालेल्या बालकांच्या मृत्यूपैकी त्यात शहरातील दोन बालकांचा समावेश आहे. गेल्या वर्षभरात शहरात बाधित झालेल्या बालकांपैकी एकाचाही मृत्यू झाला नव्हता. मात्र, आता बालकांचाही मृत्यू होत असल्याने आरोग्य तज्ज्ञांनी लहान मुलांची विशेष काळजी घेण्याचा सल्ला दिला आहे. दरम्यान, महापालिकेकडून प्राप्त अहवालानुसार २७ मार्च ते ३ एप्रिलदरम्यान शून्य ते पाच वर्षे वयोगटातील औरंगाबाद शहरात ७४ बालके कोरोनाने बाधित झाली आहेत.

बाधितांत बालकांचे हे प्रमाण वाढत्या रूग्णसंख्येच्या प्रमाणात कमी दिसत असले तरी चिंता वाढवणारे आहे. कारण, लहान मुलांवरील उपचार पद्धती आव्हान देणारी आहे. त्यामुळे आई वडिलांनी बालकांची विशेष काळजी घेणे, हाच एकमेव चांगला उपाय असल्याचे आरोग्य तज्ज्ञ सांगतात. 

वाळूज परिसरात घरफोडी, सोन्या-चांदीच्या दागिण्यांसह रोख रक्कमची चोरी

शनिवारी १८ बालकांना बाधा- 
गेल्या आठवडाभरात आढळलेल्या एकूण बाधित बालकांपैकी शनिवारी (ता. तीन ) शहरात शून्य ते पाच वर्षे वयोगटातील सर्वाधिक १८ बालके कोरोना पॉझिटिव्ह निघाली आहेत. तत्पूर्वी, २७ मार्चला १०, २८ ला ५, २९ ला ११, ३० ला ९, ३१ ला ७, १ एप्रिल रोजी १०, तर २ एप्रिलला ४ बालके बाधित निघाली आहेत. 

वयोगटानुसार बाधितांची संख्या 
- शून्य ते पाच वर्षे : ९६३ 
- सहा ते अठरा वर्षे : ५,८५८ 
- १९ ते ५० वर्षे : ३६,१८७ 
- ५१ वर्षांवरील : १७,७६८ 
शहरात एकूण बाधित : ६०,७७९.