औरंगाबाद : महापालिका हद्दीत गोवर साथीचा उद्रेक झाला असून वॉर्डावॉर्डात गोवर साथीची बालके आढळून येत आहेत. शनिवारी (ता.तीन) शहरात गोवरची अजून ११ संशयित बालके आढळून आल्यामुळे आरोग्य विभागाची चिंता वाढली आहे.

शहरात आतापर्यंत गोवरची ८८ संशयित बालके आढळून आली असून शनिवारी (ता. तीन) अजून ११ बालके संशयीत निघाल्याने संशयीत बालकांची एकूण संख्या ९९ इतकी झाली आहे. त्यापैकी ६१ बालकांच्या रक्ताचे नमुने तपासणीसाठी पाठविण्यात आले होते. त्यातून आतापर्यंत ४४ बालकांचा अहवाल प्राप्त झाला. १७ बालके पॉझिटिव्ह निघाली तर १५ बालकांचा अहवाल निगेटिव्ह आला आणि १२ बालकांचा अहवाल प्रलंबित आहे. गोवर बालकांची संख्या दिवसेंदिवस वाढत असल्याचे आरोग्य विभागाच्या अहवालावरून समोर आले आहे.

या संदर्भात माहिती देताना महापालिकेचे आरोग्य वैद्यकीय अधिकारी डॉ. पारस मंडलेचा म्हणाले की, शनिवारी गोवरची आणखी ११ संशयीत बालके आढळून आले आहेत. यामध्ये बायजीपूरा आरोग्य केंद्रातंर्गत रहेमानिया कॉलनी, गणेश कॉलनी आरोग्य केंद्रातंर्गत कोहीनूर कॉलनी, गांधीनगर आरोग्य केंद्रातंर्गत दलालवाडी, अलमगीर कॉलनी, शिवाजीनगर आरोग्य केंद्रातंर्गत देशमुखनगर, भवानीनगर आरोग्य केंद्रातंर्गत नवाबपूरा, बन्सीलाल आरोग्य केंद्रातंर्गत पदमपूरा येथील मोचीगल्ली, नारेगाव आरोग्य केंद्रातंर्गत सिडको एन-७, जयभवानीनगर आरोग्य केंद्रातंर्गत विश्रांतीनगर, नेहरूनगर आरोग्य केंद्रातंर्गत रहेमानिया कॉलनी या भागात गोवर साथीचे संशयीत बालके निघाली आहेत. या बालकांच्या रक्ताचे नमुने घेऊन ते मुंबई येथील हाफकीन प्रयोगशाळेत तपासणीसाठी पाठविण्यात येणार असल्याचे डॉ. मंडलेचा यांनी सांगितले.

१२३ बालकांचे लसीकरण

आरोग्य विभागाने ९ महिने ते ५ वर्षेवयोगटातील बालकांचे अतिरिक्त लसीकरण करण्याचे आदेश दिले आहेत. त्यानुसार शनिवारी (ता. तीन )विजयनगर, नेहरूनगर, चिकलठाणा भागात सहा शिबीरे घेऊन १२३ बालकांचे लसीकरण करण्यात आले. त्यात विजयनगरमध्ये ४२, नेहरूनगरात ३८ आणि चिकलठाणामधील ४७ बालकांचा समावेश आहे. त्यासोबतच नियमितपणे एमआर-१चे १५ आणि एमआर-२ चे २८ बालकांचे लसीकरण करण्यात आले असल्याचे डॉ. मंडलेचा यांनी सांगितले.