सिल्लोड : जन्मदात्या आईने किडनी (Kidney donation) दान करून आपल्या मुलीस जीवदान दिले असून आईच्या या निर्णयाचे जिल्हाभरातून कौतुक होत आहे.

याबाबत अधिक माहिती अशी की, पांगरी (ता.सिल्लोड) येथील छाया अशोक झरवाल मागील अडीच वर्षांपासून किडनी आजाराने त्रस्त होत्या. दोन वर्षे अगोदर त्यांच्या दोन्ही किडनी निकामी झाल्याचे निदान झाले. घटनेमुळे सर्व कुटुंब तणावात गेले. त्यानंतर किडनी रोगतज्ज्ञ डॉ.सचिन सोनी यांनी निदान करून त्यांच्यावर उपचार सुरू केले. मात्र, उपचार सुरू असताना मागील सहा महिन्यांपासून त्यांच्यावर डायलिसिस प्रक्रिया सुरू झाली. ही प्रक्रिया जास्त काळ रुग्णाला वाचवू शकत नाही, हे लक्षात आले. त्यामुळे किडनी प्रत्यारोपण करणे हाच एक पर्याय असल्याचे डॉक्टरांकडून सांगण्यात आले.

किडनी दाता मिळविणे आणि गुंतागुंतीची खर्चिक शस्त्रक्रिया करणे यामुळे सदर कुटुंबापुढे मोठे संकट उभे राहिले होते. दरम्यान, याबाबत कल्पना छाया झरवाल यांच्या आई रुखमनबाई भावलाल माहोर यांनी एक मोठा निर्णय घेत आपली किडनी मुलीसाठी देण्याची इच्छा बोलून दाखविली. पोटची मुलगी किडनी शिवाय जगणे कठीण असल्याचे माहिती होताच आई लेकीसाठी धावून आली.

सर्व प्रक्रिया पार पडल्यानंतर १ जानेवारी रोजी डॉ.अभय महाजन, डॉ.चिंचोळे, डॉ.बरनेला, डॉ.प्रदिप मुरके यांच्या टीमने यशस्वीरीत्या किडनी प्रत्यारोपण शस्त्रक्रिया पार पाडली. आई रूखमनबाई यांच्या मातृत्वाच्या वात्सल्याने छाया झरवाल यांना पुनर्जन्म मिळाला असून आईने लेकीसाठी घेतलेल्या निर्णयाचे जिल्‍हाभरात कौतुक होत आहे.