औरंगाबाद : महापालिकेने उच्च न्यायालयाच्या आदेशानंतर शहरात होर्डिंग पॉलिसी लागू करण्याचा निर्णय घेतला मात्र अजूनही ही पॉलिसी निश्‍चित झालेली नाही. १४ ते १८ नोव्हेंबर दरम्यान होर्डिंग काढण्यासाठी विशेष मोहीम राबवून प्रशासनाने औपचारिकता पूर्ण केली. ही मोहीम होऊन बारा दिवस उलटले तरी होर्डिंग पॉलिसी अजून कागदावर देखील उतरलेली नाही.

होर्डिंग पॉलिसी निश्‍चित करण्यासाठी पालिका प्रशासनाने प्रशासक डॉ. अभिजीत चौधरी यांच्या आदेशान्वये प्रभाग कार्यालयांना याबाबत पत्र पाठवले आहे. मात्र प्रभागनिहाय अजून जागांची यादीच निश्‍चित झालेली नसल्याचे सूत्रांनी सांगितले. शहर विद्रुप होवू नये, यासाठी पालिकेने ठरवून दिलेल्या जागीच यापुढे बॅनर आणि झेंडे लावण्यात येतील, असे आदेश प्रशासक डॉ. चौधरी यांनी काढलेले आहेत.

आठ बाय बारा, आठ बाय दहा, आणि पाच पाच आठ या आकारातच आता बॅनर लावण्यासाठी परवानगी असणार आहे. यासाठी प्रतिदिवस दरही ठरवण्यात येणार आहे. पाच दिवसांच्या पुढे हे बॅनर ठेवता येणार नाही. असे काही नियत प्रशासकांनी मागील आठवड्यात माध्यमांशी संवाद साधताना सांगितले होते. त्यावेळी होर्डिंग पॉलिसी लवकरच निश्‍चित केली जाईल, असेही त्यांनी स्पष्ट केले. मात्र अद्याप धोरण काही निश्‍चित झालेले नाही. शहरातील जागा निवडण्याचे काम नऊ प्रभागांच्या अधिकाऱ्यांना देण्यात आले आहे. मात्र जागा निश्‍चितीची यादीच तयार झालेली नाही. त्यामुळे पालिका प्रशासकांनी घेतलेला निर्णय दरवेळीप्रमाणे पुन्हा बारगळण्याची चिन्हे दिसत आहेत.