औरंगाबाद : राष्ट्रवादी कॉंग्रेसचे अध्यक्ष शरद पवार यांच्याबद्दल बेताल वक्तव्य केल्याबद्दल अभिनेत्री केतकी चितळेंच्या विरोधात शनिवारी राष्ट्रवादी शहर महिला आघाडीतर्फे सूत गिरणी चौकात निदर्शने करण्यात आले. यावेळी जोरदार घोषणा देत केतकी चितळे यांच्या फोटोला काळे फासून निषेध करण्यात आला. तसेच जवाहर नगर पोलिसात तक्रार नोंदविण्यात आली.

शरद पवार हे देशाचे नेते आहेत. त्यांचे राजकारण, समाजकारण, लोकनेते म्हणून उभी हयात गेलेली आहे. राज्याला विविध क्षेत्रामध्ये गती देऊन लोकविकासाचे काम शरद पवार यांनी केले आहे. अशा नेत्या विरोधात चितळे यांनी समाज माध्यमावर आक्षेपार्ह पोस्ट केली आहे. अशी प्रवृत्ती समाजाला घातक आहेत. यामुळे केतकी चितळे विरोधात गुन्हा नोंदवावा व अशा प्रवृत्तींना आळा घालावा अशी मागणी निवेदनात केली आहे. यावेळी राष्ट्रवादी महिला अध्यक्ष मेहराज पटेल, युवती शहराध्यक्ष अंकिता विधाते, धनश्री तळवळकर, शिल्पा भोसले, मंजूषा पवार, सुरेखा जगताप, शकीला खान शमा परवेझ, कविता होळकर, संघमित्रा खंदारे, कविता वर्षा कल्याणी काकडे, स्नेहल शिर्के, सुप्रिया जाधव, पूजा जगताप, पूजा आंबे, शकीला खान, सुवर्णा जगताप उपस्थित होत्या.