औरंगाबाद : ऑक्सिजन, आयसीयू खाटांची गरज असलेल्या कोरोनाबाधित गंभीर रुग्णांवर घाटी रुग्णालयात उपचार करण्यात येत आहेत. बहुतांश रुग्णालये व कोविड सेंटरमधूनही घाटीत रुग्ण भरती केले जातात; परंतू या प्रक्रियेसाठी ‘एसओपी’ घाटी रुग्णालय प्रशासनाने तयार केली, जिल्हाधिकाऱ्यांच्या अनुमतीनंतर ती लवकरच अमंलात येईल, अशी माहिती प्रभारी वैद्यकीय अधिष्ठाता डॉ. वर्षा रोटे यांनी दिली.

औरंगाबादेत दररोज वाढतेय कोरोनाबाधितांची संख्या, सात जणांचा मृत्यू

जिल्हाधिकारी सुनील चव्हाण यांनी आज (ता. १६) घाटी रुग्णालयाचा आढावा घेतला. बेड वाढविण्याची सूचना त्यांनी घाटी प्रशासनाला केली. तसेच नॉन कोविड रुग्णांच्या उपचाराबाबत त्यांनी सुचना केल्याची माहितीही डॉ. वर्षा रोटे यांनी दिली. कोविड केअर सेंटर व इतर ठिकाणी रुग्णांवर उपचार होतात. तेथे त्यांच्या प्रकृतीबाबत समस्या उद्भवल्यास पुढील प्रक्रीयेबाबत एक एसओपी तयार करण्यात आली आहे. ती एसओपी जिल्हाधिकारी कार्यालयामार्फत कोविड केअर सेंटर व कोरोनाबाधितांवर उपचार करणाऱ्या आरोग्य संस्थांना देण्यात येईल असेही त्या म्हणाल्या.

विद्यार्थ्यांना करावी लागतेय वेटींग
घाटी रुग्णालयातील वैद्यकीय शिक्षण घेणारे विद्यार्थी, प्रशिक्षणार्थी मोठ्या संख्येने वसतीगृहात राहतात. या वसतीगृहातील प्रशिक्षणार्थी डॉक्टर्स कोरोनाबाधित आढळत आहेत. परंतू त्यांना खाटासाठी वेटींग करावी लागत आहे. रुग्णाला सुटी झाल्यानंतर त्यांना खाटा मिळत असून १२ ते १६ तास वेटींग करावी लागत आहे. याबाबत डॉ. रोटे यांनी त्यांच्या नियोजनाबाबत उपाय योजनाही केल्याचे सांगितले.

संपादन - गणेश पिटेकर