औरंगाबाद : देशातील काही भागांमध्ये राम नवमीनिमित्त पार पडलेल्या मिरवणुकी दरम्यान हिंसेच्या घटना घडल्या आहेत. देशात सांप्रदायवाद वाढत चालला आहे का? सध्या धर्मा-धर्मामध्ये भांडण लावण्याचे काम सुरु आहे. महागाई, बेरोजगारी आणि वीजपुरवठा असे अनेक प्रश्न देशासमोर असताना सामाजिक वीण कुठे तरी उसवण्याचा प्रयत्न होताना दिसत आहे. मटण हलाल, मासांहार विरुद्ध शाकाहार असा वाद सुरु आहे. मात्र असं सर्व घडत असताना एक सुखद घटना मराठवाड्याची राजधानी औरंगाबादमध्ये (Aurangabad) घडली आहे. निमित्त होते राम नवमीचे (Ram Navami). या प्रसंगी युवा सेनेतर्फे काढण्यात आलेली मिरवणूक उस्मानपुरा येथील तारापान जवळील बडी मशिदीजवळ आली असता डिजे आणि घोषणा बंद करण्यात आल्या. (Viral Video Aurangabad Ram Navami Video Viral, It Set Hindu Muslim Unity Example)

मशिदीच्या पुढे गेल्यानंतर पुन्हा डिजे लावण्यात आला आणि घोषणा सुरु झाल्या. या पूर्ण घटनेचा व्हिडिओ सोशल मीडियावर प्रचंड व्हायरल होत आहे. त्यात मिरवणुकीत सहभागी कार्यकर्त्यांना मशिदीपुढे गेल्यानंतर आपला डिजे लावला जाईल असे आवाहन करताना युवा सेनेचे (Yuva Sena) उपशहर प्रमुख आदित्य दहिवाळ यांचा आवाज ऐकू येतो. 'ई-सकाळ'शी बोलताना आदित्य म्हणाले, की आपल्या शहरात सर्वधर्म लोक एकत्र राहतात. उस्मानपुरा भागात आम्ही सर्व ईद असो दिवाळी एकमेकांच्या घरी जाऊन साजरा करतो.

अवती-भवती तिरस्काराचे राजकारण वाढत असताना अशी सुखद घटना 'आयडिया ऑफ इंडिया' ला आणखीन बळकटी देते. भारतात एकमेकांच्या धर्माचा आदर पूर्वीपासून केला जातो. आणि तो आजही सुरुच आहे. त्याचं जिवंत उदाहरण म्हणजे औरंगाबादेतील सदरील घटना.

सर्व जातीधर्मांनी गुण्यगोविंदाने एकत्र राहावे. कोणाच्याही भावना दुःखवणे आपला अधिकार नाही. हिंदु-मुस्लिम यांची एकजुट राहणे आवश्यक आहे.

- आदित्य दहिवाळ, उपशहर प्रमुख, युवासेना, औरंगाबाद