औरंगाबाद : उसने दिलेले पैसे मुदतीत परत केले नाही म्हणून नातेवाईक महिलेवर बळजबरी बलात्‍कार करणाऱ्याला क्रांतीचौक पोलिसांनी शनिवारी (ता. २८) रात्री बेड्या ठोकल्या. शेख मेहमूद शेख महेबूब (वय ४९, रा. अजबनगर) असे आरोपीचे नाव आहे.

त्‍याला ३१ जानेवारीपर्यंत पोलिस कोठडीत ठेवण्‍याचे आदेश प्रथमवर्ग न्‍यायदंडाधिकारी एस. एस. घोडके यांनी रविवारी (ता.२९) दिले. या प्रकरणात ३८ वर्षीय पीडित महिलेने फिर्याद दिली. त्यानुसार, पीडिता ही खासगी नोकरी करते. मार्च २०२२ मध्‍ये पीडितेच्‍या मोठ्या मुलाचे लग्न ठरल्याने तिला पैशांची आवश्‍यकता होती. त्‍यामुळे तिने आपल्या नातेवाईक महिलेकडून ५० हजार रुपये उसने घेतले होते.

ही बाब नातेवाईक महिलेचा पती तथा आरोपी शेख महेमूद याला कळली. त्‍याने पीडिता काम करत असलेल्या ठिकाणी जाऊन पैसे वेळेवर परत न केल्याने शरीर सुखाची मागणी केली. पीडितेने नकार दिला, मात्र आरोपीने पीडितेवर बळजबरीने इमारतीच्‍या टेरेसवर बलात्‍कार केला. या प्रकरणात क्रांतीचौक पोलिस ठाण्‍यात गुन्‍हा दाखल आहे. आरोपीला आज न्‍यायालयात हजर करण्‍यात आले असता, सहायक सरकारी वकील समीर बेदरे यांनी युक्तिवाद केला.