औरंगाबाद : शहर परिसरात दोन ठिकाणी घरफोड्या करत चोरट्यांनी दागिन्यांसह सोन्या चांदीचा ऐवज लंपास केला. याप्रकरणी संबंधित पोलिस ठाण्यात गुन्हे दाखल करण्यात आले आहेत. पहिल्या घटनेत विलास मधुकरराव हस्तक (६७, रा. चंद्रगुप्तनगरी, रामतारा हाऊसिंग सोसायटी) यांनी फिर्याद दिली. त्यानुसार ते २० ऑगष्ट रोजी पत्नीसह पुण्यात राहणाऱ्या मुलास भेटण्यासाठी गेले होते. २८ ऑगष्टरोजी घरी आले असता, त्यांना दरवाजाचा कडीकोयंडा तुटलेला दिसला.

चोरी गेलेल्या दागिन्यात तीन तोळ्यांचे मंगळसुत्र (अंदाजे किमत ९६ हजार रुपये), पाच ग्रॅमचे तीन अंगठ्या(२० हजार), तीन मोत्यांचा माळा (एक हजार) आणि पाच हजार रुपये रोख असा एकूण एक लाख २२ हजार रुपयांचा ऐवज लंपास झाल्याचे समोर आल्यानंतर हस्तक यांनी तत्काळ पोलिस ठाण्यात धाव घेऊन फिर्याद दिली असता, संशयितांविरोधात जवाहरनगर पोलिस ठाण्यात गुन्हा दाखल करण्यात आला आहे.

वाल्मीसमोरचे घर फोडून दागिने लंपास

दुसऱ्या घटनेत चालकाचे घर फोडून चोरट्याने सोन्या-चांदीचे चार तोळ्यांचे दागिने लंपास केले. ही घटना २१ ते २८ ऑगस्ट दरम्यान सुमंगल गार्डन, वाल्मीसमोर, कांचनवाडी येथे घडली. सुहास विनायकराव कुलकर्णी (५९, रा. रो-हाऊस, बी-६, सुमंगल गार्डन, वाल्मीसमोर) हे कामानिमित्त बाहेरगावी गेले होते.

हीच संधी साधून चोराने घराचे कुलूप तोडून आत प्रवेश केला. लाकडी कपाटातून ४ तोळ्याचे सोन्याचे दागिने यामध्ये २ नेकलेस, २ अंगठ्या, १ कर्णफुले, १ कानातील वेल, अर्धा किलो चांदीच्या वस्तू यामध्ये वाट्या, २ निरांजणी, २ फुलपात्र, २ मोरनी, २६ धोंडे, २ ताट, १ अत्तरदानी, १ ताम्हण आणि २ चैन असा मुद्देमाल चोराने लंपास केला. याप्रकरणी सातारा पोलीस ठाण्यात गुन्हा दाखल करण्यात आला आहे. पुढील तपास उपनिरीक्षक देविदास शेवाळे हे करीत आहेत.