जालना : राज्यात गतवर्षी बर्ड फ्लूची साथ आली होती. याचा फटका कुक्कुटपालन करणाऱ्यांना बसला होता. त्यानंतर आता पुन्हा ठाणे जिल्ह्यात बर्ड फ्लूचा शिरकाव झाला. त्यामुळे खबरदारी म्हणून जालना जिल्ह्यात पशुसंवर्धन विभाग दक्ष झाला. प्रत्येक तालुक्यात दोन पथके स्थापन करण्यात आली आहेत.

जिल्ह्यात कुक्कुटपालन व्यवसाय मोठ्या प्रमाणावर केला जातो. आजघडीला जिल्ह्यामध्ये सव्वा ते दीड लाख कुक्कुटपालन असलेले दोन मोठे उद्योग आहेत तर छोटे-मोठे १२५ ते १५० कुक्कुटपालन व्यवसाय करणारे आहेत. राज्यात गतवर्षी जानेवारी महिन्यात बर्ड फ्लूची साथ आली होती. यावेळी जिल्ह्यात बर्ड फ्लू आल्याने काही कोंबड्यांचा मृत्यू झाला होता. त्यामुळे कुक्कुटपालन व्यवसायावर विपरीत परिणाम झाला होता.

गतवर्षी चिकनचे दर खाली आले होते. त्यामुळे कुक्कुटपालन आर्थिक अडचणीत आले होते. अशात आता राज्यात बर्ड फ्लूची साथ आली आहे. ठाणे जिल्ह्यात बर्ड फ्लूमुळे हजारो कोंबड्या मारण्याचा निर्णय घेण्यात आला. अशात जिल्ह्यात ही पशुसंवर्धन विभाग दक्ष झाला आहे. बर्ड फ्लूच्या पार्श्वभूमिवर जिल्ह्यात १६ पथकांची स्थापना केली आहे. प्रत्येक पथकामध्ये पशुवैद्यकीय डॉक्टर व कर्मचाऱ्यांचा समावेश आहे. शिवाय पशुसंवर्धन विभाग दक्ष असून, कोंबड्या आजारी पडल्यास त्यांच्या उपचारासह याची माहिती संकलन करण्याच्या कामाच्या तयारी लागले आहे.

सोमवारी बैठक होण्याची शक्यता

राज्यात बर्ज फ्लूची साथ आल्याने जिल्ह्यातील पशुसंवर्धन विभागाकडून दक्ष आहे. शिवाय सोमवारी (ता.२२) जिल्हाधिकारी डॉ. विजय राठोड व पशुसंवर्धन विभागाची याबाबत बैठक होण्याची शक्यता आहे.

''जिल्ह्यात अद्याप बर्ड फ्लूची लागण झालेले नाही. परंतु, ठाणे जिल्ह्यात बर्ड फ्लूची साथ आल्याने आम्ही सतर्क झालो. प्रत्येक तालुक्यात दोन पथके स्थापन केलेली आहेत.''

- अमितकुमार दुबे, सहाय्यक आयुक्त, पशुसंवर्धन आयुक्त कार्यालय, जालना.