दौलताबाद : लोकसभा निवडणुकीचा निकाल आमच्याच बाजूने लागेल असा आम्हाला पूर्ण विश्वास आहे. आमची दक्षिणमुखी मारुतीरायावर (Dakshinmukhi Maruti Mandir) जास्त श्रद्धा असून देव आम्हाला नक्की यश देईल, असा आम्हाला विश्वास आहे. निवडणूक काळात व निकालाच्या वेळी आम्ही इथं विशेष यज्ञाचं आयोजन करत असतो. त्यामुळं दक्षिणमुखी मारुतीराया आम्हाला चांगलं यश देईल, असा विश्वास माजी खासदार व शिवसेना ठाकरे गटाचे नेते, उमेदवार चंद्रकांत खैरे (Chandrakant Khaire) यांनी दक्षिण मुखी हनुमान मंदिरात व्यक्त केला.

देशातील व महाराष्ट्रातील सत्ता संघर्षकडं सर्व राज्याचं लक्ष लागून आहे. विविध प्रसार माध्यमांनी नुकताच निवडणूक पूर्व अंदाज व्यक्त केला. काही माध्यमांच्या सर्व्हेनुसार, छत्रपती संभाजीनगरची (Chhatrapati Sambhaji Nagar Lok Sabha Result) जागा इंडिया आघाडीतील उबाठा गट जिंकणार असे संकेत दिले आहेत.

त्याच अनुषंगाने मारुतीरायाचा आशीर्वाद पाठिशी राहावा यासाठी ठाकरे गटाचे नेते चंद्रकांत खैरे यांनी आज (रविवार) दौलताबाद येथील पुरातन दक्षिणमुखी मारुती मंदिरात यज्ञाचे आयोजन केले आहे. या यज्ञाचे फलित सत्य वागणाऱ्याला शंभर टक्के मिळते, असे यावेळी ब्रम्हवृंद श्री मुळे गुरुजी यांनी सांगितले. शिवसेना व विशेष करून ठाकरे कुटुंबावर कुठलेही दुःखद क्षण आल्यास खैरे हे नेहमीच दक्षिण मुखी हनुमान मंदिरात पूजा पाठ यज्ञाचं आयोजन करत असतात, अशी माहिती मंदिरातील पुजाऱ्यांनी दिली.

दरम्यान, प्रसिद्ध दक्षिणमुखी व नवगृह मंदिरात महायज्ञाचं आयोजन केलं होतं. ११ ब्रह्मवृदांच्या उपस्थितीत हा यज्ञ यशस्वी झाला. कुष्णाकांत मुळे यांच्या अधिपत्याखाली मंदिरात मागील एक महिन्यांपासून यज्ञ सुरू आहे. हनुमान मंदिरात खैरे यांनी आज सकाळी अकरापासून होम हवन पूजा सुरु केली आहे. ही पूजा आठ तास चालणार आहे. या मंदिरात केंद्रीय गृहमंत्री अमित शहा हे सुद्धा पत्नीसह अधून मधून भेट देत असतात.