औरंगाबाद - महाविकास आघाडी सरकारने औरंगाबादचे नामांतर ‘संभाजीनगर’ करून या प्रस्तावास मंजुरी दिली होती, मात्र शिंदे- फडणवीस सरकारने संभाजीनगर नामांतराला स्थगिती दिली. या संदर्भात शिवसेनेचे नेते चंद्रकांत खैरे यांनी यावर जोरदार टिका करत एक महिन्यात शहराच्या नामांतराचा ठराव केंद्रातून मंजूर करून आणा अन्यथा शिवसेना रस्त्यावर उतरेल, असा इशारा दिला.

शिवसेना नेते खैरे म्हणाले, की यापूर्वी ज्यावेळी शहराच्या नामांतराचा निर्णय झाला त्यावेळी विद्यमान मुख्यमंत्री एकनाथ शिंदे यांनी हा ठराव दिल्लीला पाठवू म्हटले होते. मग आता काय झाले? मुख्यमंत्री एकनाथ शिंदे-उपमुख्यमंत्री देवेंद्र फडणवीस यांनी श्रेय घेण्यासाठी नामांतराचा निर्णय स्थगित केला आहे.

आता केंद्रातही तुमचेच सरकार आहे. एक महिन्यात मुख्यमंत्री-उपमुख्यमंत्री यांनी दिल्लीला जाऊन नामांतर करून आणा, असे आव्हान देत महिनाभरात निर्णय झाला नाही तर जशास तसे उत्तर दिले जाईल, असा इशारा त्यांनी दिला. शिवसेना संपविण्याचा भाजपचा अजेंडा असल्याचा आरोप करीत ही शिवसेना शिवसेनाप्रमुख बाळासाहेब ठाकरे यांची असून कधीही संपणार नाही, असे ठणकावले. शिवसेनेचे जिल्हाप्रमुख आमदार अंबादास दानवे म्हणाले, एकीकडे दोन सदस्यीय मंत्रीमंडळ हिंदुत्वासाठी हाकाट्या पिटते आणि दुसरीकडे शहराच्या नामांतराचा निर्णय स्थगित करत आहे. औरंगाबादचे संभाजीनगर नामांतर झाले पाहिजे, यासाठी शिवसेना जनतेला सोबत घेऊन रस्त्यावर उतरेल, असा सरकारला इशारा दिला.

आज आंदोलन

नामांतराचा निर्णय स्थगित केल्याच्या निर्णयाविरोधात शिवसेनेच्यावतीने शनिवारी सकाळी १० वाजता हडको टि. व्ही. सेंटर इथे छत्रपती संभाजी महाराज पुतळ्याजवळ आंदोलन करण्यात येणार आहे. शिवसेना नेते चंद्रकांत खैरे, जिल्हाप्रमुख आमदार अंबादास दानवे यांच्या नेतृत्वाखाली हे आंदोलन करण्यात येणार असून आंदोलनात सर्व पदाधिकाऱ्यांनी मोठ्या संख्येने उपस्थित राहण्याचे आवाहन करण्यात आले.