छत्रपती संभाजीनगर - जिल्हा परिषद शाळांतील विद्यार्थ्यांना संगणकाचे ज्ञान मिळावे, याकरिता सर्व शिक्षा अभियानांतर्गत जिल्ह्यातील शाळांमध्ये संगणक उपलब्ध करून देण्यात आले. मात्र, जोडणीअभावी संगणक धूळखात पडून असल्याचे वृत्त ‘सकाळ’ने प्रकाशित केले होते.

याची दखल घेत संबंधित शाळा व कंत्राटदाराकडून तातडीने संगणक जोडणीचे काम पूर्ण करण्यात आले. जिल्ह्यातील जवळपास ७८ शाळांमध्ये या उपक्रमाच्या माध्यमातून आयसीटी लॅब तयार करण्यात आल्या आहेत. त्यामुळे गरिबांची मुलेही आता आधुनिक शिक्षणात रमणार आहेत.

आयसीटी लॅबच्या फर्निचरसाठी जिल्हा परिषदेकडून संबंधित शाळांना निधी देखील वितरीत करण्यात आला होता. मात्र, तांत्रिक अडचणींमुळे हा निधी परत गेला होता. त्यामुळे आयसीटी लॅब उभारण्यास शाळांना अडचणी निर्माण झाल्या होत्या. तसेच जोडणीअभावी जिल्ह्यातील जवळपास ५० शाळांमधील जवळपास ५५० संगणक प्रत्येकी एक प्रिंटर, बॅटरी, इन्व्हटर, प्रोजेक्टर असे साहित्य धूळखात पडून होते.

याबाबत ‘सकाळ’ने वृत्त प्रकाशित केल्यानंतर संबंधित शाळेतील मुख्याध्यापकांनी आयसीटी लॅबसाठी फर्निचर उभारले तर कंत्राटदाराकडून संगणकासह इतर साहित्यांची जोडणी करुन देण्यात येत आहे. केंद्र सरकारच्या ‘इन्फॉर्मेशन अँड कम्युनिकेशन टेक्नॉलॉजी इन स्कूल’ (आयसीटी) योजनेंतर्गत छत्रपती संभाजीनगर जिल्ह्यातील तब्बल ७८ शाळांमध्ये संगणक प्रयोगशाळा स्थापन करण्याचे काम अंतिम टप्प्यात आहे