छत्रपती संभाजीनगर : फारोळा येथील मॅनिफोल्ड पाईपची दुरुस्ती होत नाही तोच जायकवाडी येथे वीज अचानक खंडित झाल्याने महापालिकेच्या दोन्ही योजना बंद पडल्या. त्यामुळे शहरात येणारे पाणी बंद झाले व सलग दुसऱ्या दिवशी शहराच्या बहुतांश भागात पाण्याचा ठणठणाट होता. काही भागातील पाण्याचे टप्पे एक दिवसाने पुढे ढकलण्याचा निर्णय घेतला आहे.

शहराच्या पाणी पुरवठ्यात वारंवार व्यत्यय येत आहे. सोमवारी (ता. तीन) सकाळी फारोळा येथील ७०० मिलिमीटर व्यासाच्या मॅनिफोल्ड पाइप फुटला. त्यामुळे पाणी उपसा बंद पडला. पाइपच्या दुरुस्तीसाठी महापालिकेला तब्बल १४ तासाचा कालावधी लागला.

रात्री ९ वाजेच्या सुमारास पाणी उपसा पुर्ववत झाला. त्यानंतर मध्यरात्री एक वाजता अचानक जायकवाडी येथे स्पार्किंग झाल्यामुळे वीज पुरवठा खंडित झाला. त्यामुळे दोन्ही योजनेचा पाणी उपसा बंद पडला. मंगळवारी पहाटे पाच वाजता वीज पुरवठा सुरळीत झाला.

चार तास शहरात येणारे पाणी बंद झाल्यामुळे जलकुंभ भरले नाहीत. जुने शहर, सिडको-हडको, गारखेडा, शिवाजीनगर, भीमनगर-भावसिंगपूरा, विद्यापीठ परिसर, लेबर कॉलनी, चिकलठाणा, मुकूंदवाडी भागातील पाणीपुरवठ्याला फटका बसला.

ज्या भागात काल पाणी पुरवठा होऊ शकला नव्हता, त्या भागाला दुपारी १२ वाजेनंतर पाणीपुरवठा करण्यात आला. काही भागाला तब्बल सहा ते सात तास उशिराने पाणी देण्यात आले. शहराच्या सर्वच भागातील पाण्याचे नियोजन कोलमडले असून नागरिकांवर पाण्यासाठी भटकंती करण्याची वेळ आली आहे.