छत्रपती संभाजीनगर - पावसाळा संपला अन हिवाळ्याची सुरवात झाली. रेनकोट, छत्र्या कपाट, ट्रंक अन गाठोड्यात गेले आणि उबदार कपडे बाहेर आले. मात्र, गेल्या दोन दिवसांतील वातावरणाने पुन्हा उबदार कपडे ठेवून रेनकोट काढण्याची वेळ आणली. यापूर्वी १९९६ मध्ये नोव्हेंबरमध्ये पावसाने असेच झोडपले होते, त्याची २७ वर्षांनी पुनरावृत्ती झाली.

खऱ्या अर्थाने थंडीची चाहूल लागते ती येळवसपासून (येळ अमावस्या). येळवस सुरू होताच मारुतीच्या मंदिरामागे बसलेली थंडी हळूच गावामध्ये प्रवेश करते, असा ग्रामीण भागात हिवाळा सुरू होण्याविषयीचा ठोकताळा आहे. प्रादेशिक हवामान खात्याने ता. २५ पासून २७ नोव्हेंबरपर्यंत वादळी वाऱ्यासह गारपीट होण्याची शक्यता वर्तवली होती. मात्र, अनेकांनी हवामान खात्याच्या अंदाजाला धुडकावले.

रविवारचा सुटीचा दिवस अनेकांसाठी फिरण्यासाठीचा. दिवसभर आराम करून संध्याकाळच्या वेळेस मस्तपैकी भटकंती करण्यासाठी अनेकजण निघाले अन् नेमके त्याच वेळेस हवामान खात्याचा अंदाज खरा ठरवत पावसाने हजेरी लावली. नुसती हजेरीच लावली नाही तर शहराला चांगलेच झोडपले. अनेकांचे स्वेटर, मफलर, कानटोप्या आल्या झाल्या.

दुचाकी चालविणाऱ्यांना पावसात भिजत गारव्यामुळे थरथरत्या हाताने दुचाकी चालवत घर गाठण्याची वेळ आली. सोमवारी रात्रीही चांगलाच पाऊस झाला. त्यामुळे कपाटात ठेवलेले रेनकोट बाहेर काढावे लागले. असेच वातावरण ३ डिसेंबरपर्यंत ढगाळ वातावरण राहणार असल्याचा हवामान खात्याने अंदाज व्यक्त केला आहे.

नोव्हेंबरमध्ये भारतभर १९ ते २० मिलिमीटर अवकाळी पाऊस होत असतो. मात्र, यावेळी याचे प्रमाण जास्त राहिले. यापूर्वी १९९६-९७ मध्ये नोव्हेंबरमध्ये असाच मोठा पाऊस झाला होता. उत्तरेकडून येणारे थंड वारे आणि दक्षिणेकडून येणारे बाष्प यांची टक्कर होऊन अशी परिस्थिती निर्माण होते. नोव्हेंबरच्या शेवटच्या आठवड्यापासून डिसेंबरच्या दुसऱ्या आठवड्यापर्यंत साधारण अशी स्थिती असते.

- उदय देवळाणकर, शेती व हवामानाचे अभ्यासक