औरंगाबाद : एसटी महामंडळाच्या कर्मचाऱ्यांच्या संपामुळे बंद असलेली शहर बस सेवा तब्बल ७७ दिवसानंतर रविवारपासून (ता.२४) सुरू होणार आहे. स्मार्ट शहर बसचा रविवारी तिसऱ्या वर्धापनदिन असून, बसचे स्टिअरिंग आता माजी सैनिकांच्या हाती राहणार आहे. पहिल्या टप्प्यात ११ बस दोन टप्प्यात सुरू केल्या जाणार आहेत.

शहर बससेवेसाठी औरंगाबाद स्मार्ट सिटी डेव्हलपमेंट कार्पोरेशन व एसटी महामंडळ यांच्या करार झाला होता. शहर बससाठी लागणारे चालक-वाहक महामंडळामार्फत पुरविले जात होते. पण एसटी महामंडळाचे कर्मचारी संपावर असून, ७७ दिवसांपासून शहर बस सेवाही बंद आहे. दरम्यान महापालिकेचे प्रशासक आस्तिककुमार पांडेय यांनी एसटी महामंडळापासून शहर बससेवा वेगळी केली जाईल, असे जाहीर केले होते. त्यानुसार त्यांनी शहर बससाठी करार पद्धतीने माजी सैनिकांची नियुक्ती करण्याचा निर्णय घेतला आहे. ज्यांना चालक म्हणून १५ वर्षाचा अनुभव आहे, त्यांची नेमणूक करण्यात आली आहे. त्यामुळे रविवारपासून ११ बसेस रस्त्यावर धावतील. शहर बस विभागाचे मुख्य चालन व्यवस्थापक राम पवणीकर, उप व्यवस्थापक मुकुल देव व सिध्दार्थ बनसोड यांच्या देखरेखीखाली ५६ चालक व वाहकांचे प्रशिक्षण पूर्ण करण्यात आले आहे.

या मार्गावर पाच धावणार बस

मार्ग क्रमांक- ४

सिडको ते रेल्वे स्टेशन मार्गे-टीव्ही सेंटर

मार्ग क्रमांक-५

औरंगपुरा ते रांजणगाव मार्गे-मध्यवर्ती बस स्थानक

मार्ग क्रमांक- १२

सिडको ते घाणेगाव मार्गे-रांजणगाव.

मार्ग क्रमांक-१३

सिडको ते जोगेश्वरी मार्गे-रांजणगाव

मार्ग क्रमांक- १९

चिकलठाणा ते रांजणगाव मार्गे-सिडको, महावीर चौक, मोरे चौक

कोरोनाचे नियम पाळणे बंधनकारक

शहर बसमधून प्रवास करताना प्रवाशांना कोरोनासंदर्भातील नियमांचे पालन करावे लागणार आहे. प्रवासाच्या वेळी मास्क, सॅनिटायझर वापरणे, कोविड प्रतिबंधक दोन लस घेऊनच प्रवास करणे व शासकीय आरोग्य विषयक सूचनांचे पालन करणे आवश्यक असल्याचे स्मार्ट शहर बस विभागाकडून कळविण्यात आले आहे. अधिक माहितीसाठी ७५०७९५३८२८ व्हाट्सॲप क्रमांकावर संपर्क करावा, असे आवाहन करण्यात आले आहे.