औरंगाबाद: राज्य शासनाने सोमवारपासून शाळा सुरु करण्याचा निर्णय घेतला. पंरतू, मनपा प्रशासनाने(Municipal administration) आठ दिवसांचा आढावा घेवून शाळा सुरु करण्याचा निर्णय घेवू असा खोडा घातल्याने संस्थाचालक, शिक्षक, पालकांनी तीव्र निषेध व्यक्त केला आहे. शालेय शिक्षणमंत्री वर्षा गायकवाड(Varsha Gaikwad)यांनी सोमवारपासून शाळा सुरू करण्याचा निर्णय जाहीर केला आहे. यापार्श्‍वभूमीवर विचारणा केली असता, श्री. पांडेय म्हणाले, की शहरात सध्या कोरोनाबाधित रुग्णांची संख्या वाढत आहे. त्यामुळे आठ दिवसानंतर परिस्थिती पाहून निर्णय घेतला जाई

यावर मुख्याध्यापक संघटनेचे प्रकाश सोनवणे म्हणाले की, शहरातील मॉल, बाजार, सिनेमा हॉल, बार, मॉल, हॉटेल सुरु ठेवण्यासाठी परिस्थितीचा आढावा का घेतला नाही? आताच नगरपरीषद, जिल्हा परीषद निवडणुका झाल्या, त्यात मोठ्या प्रमाणात गर्दी झाली तेंव्हा कुठे गेला होता कोरोना? मात्र, शाळा सुरु करण्याचा निर्णय घेण्याची वेळ आली की, कोरोनाचे नाव पुढे केले जाते. मुख्याध्यापिका कल्याणी सांगोले म्हणाल्या की, मुलांच्या शिक्षणाची ही गळचेपी आहे. सर्वच बंद ठेवा, नाहीतर सगळी आस्थापने सुरु ठेवा. केवळ शाळा बंद ठेवून मुलांची भावी पीढी बरबाद करण्याचा मनपा प्रशासनाला अधिकार नाही.

राज्य शासनानकडून शाळा सुरु करण्याचा निर्णय घेतल्यानंतर मनपा प्रशासनाने कधीच शाळा लवकर सुरु व्हाव्यात यासाठी स्वतःहून पुढाकार घेतला नाही. मनपा प्रशासनाने सुरु असलेल्या आस्थापना बंद करुन केवळ शाळा सुरु ठेवाव्यात, मग कोरोना रुग्ण संख्येत वाढ होते का ते पहावे. केवळ शाळा, महाविद्यालयासाठीचा निर्णय राखून ठेवणे म्हणजे विद्यार्थ्यांच्या शिक्षणावर गदा आणल्यासारखे आहे, असे पालक युसूप पटेल यांनी सांगितले.शिक्षण क्षेत्रातील तज्ज्ञ, शिक्षक, पालक, विद्यार्थी यांची मागणी ‘सकाळ’ ने उचलून धरली. राज्य शासनाने याला सकारात्मक प्रतिसाद दिला. त्याबद्दल सकाळ आणि शासनाचे धन्यवाद. आता स्थानिक प्रशासनासही राज्यशासनाने शाळा सुरू करण्याचे आदेश द्यावेत. स्थानिक परिस्थिती बघून किती दिवस निर्णय लांबविणार याची मर्यादा शासनाने ठरवून द्यायला हवी.

-डॉ. रूपेश मोरे, शिक्षणतज्ज्ञ