औरंगाबाद: ६१ वा दीक्षांत समारंभ शुक्रवारी (ता.२५) ऑनलाइन होणार आहे. कुलपती तथा राज्यपाल भगतसिंह कोशियारी यांच्या अध्यक्षतेखाली दीक्षांत समारंभ होईल, अशी माहिती कुलगुरू डॉ. प्रमोद येवले यांनी मंगळवारी (ता.२२) पत्रकार परिषदेत दिली. डॉ. येवले म्हणाले, यंदा राज्यातील सर्वच विद्यापीठांचे दीक्षांत समारंभ ऑनलाइन पद्धतीने घेण्याचे निर्देश आहेत.

अखिल भारतीय तंत्रशिक्षण परिषदेचे अध्यक्ष ज्येष्ठ शिक्षणतज्ज्ञ डॉ. अनिल सहस्रबुद्धे हे दीक्षांत समारंभाचे प्रमुख पाहुणे आहेत. महाराष्ट्राचे उच्च व तंत्रशिक्षणमंत्री उदय सामंत यांच्यासह सर्व अधिष्ठाता, व्यवस्थापन परिषदेचे सदस्य सोहळ्यास उपस्थित राहणार आहेत. विद्यापीठ नाट्यगृहात सकाळी साडेदहा ते दुपारी साडेबारादरम्यान समारंभ होईल. यावेळी पीएच.डी. मंचावर संशोधकांच्या पीएच.डी. चे वितरण प्रत्यक्ष न घेता ऑनलाइन पद्धतीने नाववाचन होईल. (Dr. Babasaheb Ambedkar Marathwada University convocation ceremony)

समारंभात ४२७ संशोधकांना पीएच.डी. प्रदान करण्यात येईल. या कार्यक्रमात एकूण ८१ हजार ७३६ पदवीधारकांना पदवी प्रदान करण्यात येईल. पत्रकार परिषदेस प्र-कुलगुरू डॉ. श्याम शिरसाठ, कुलसचिव डॉ. जयश्री सूर्यवंशी, परीक्षा व मूल्यमापन मंडळाचे संचालक डॉ. योगेश पाटील यांच्यासह प्रसिद्धी समितीचे अध्यक्ष डॉ. कैलास पाथ्रीकर, डॉ. कैलास अंभुरे, प्रा. पराग हासे, संजय शिंदे आदींची उपस्थिती होती.