औरंगाबाद: शहरातील कोरोना पॉझिटिव्ह रुग्णांची संख्या कमी होत असल्याने दुसरीकडे चाचण्या देखील निम्‍म्यावर आल्या आहेत. दुसऱ्या लाटेत सरासरी चार ते पाच हजार ॲन्टीजेन व आरटीपीसीआर चाचण्या केल्या जात होत्या मात्र ही संख्या आता एक ते दीड हजाराच्या दरम्यान आली आहे. कोरोनाच्या दुसऱ्या लाटेत शहरात रुग्णांची संख्या झपाट्याने वाढली. एखाद्या घरातील सदस्य पॉझिटिव्ह येताच कुटुंबातील सर्वच जण चाचण्या करून घेत होते. त्यामुळे महापालिकेच्या चाचणी केंद्रांवर दिवसभर रांगा दिसून येत होत्या. मात्र सध्या या केंद्रावर शुकशुकाट आहे.

गेल्या काही दिवसांपासून रुग्णांची संख्या २० च्या खाली आली आहे. त्यामुळे चाचण्यांची संख्या देखील घटली आहे. रोजच्या सरासरी एक ते दीड हजार चाचण्या केल्या जात आहेत. रविवारी (ता. चार) तर ७१७ एवढ्या कमी चाचण्या करण्यात आल्या. मंगळवारी (ता. सहा) १६५४ जणांच्या चाचण्या करण्यात आल्या. शहराच्या सहा एन्‍ट्री पॉइंट, नऊ सरकारी कार्यालये अशा ३८ केंद्रावर रोज चाचण्या केल्या जात आहेत. पण या सर्वच ठिकाणी चाचण्यांचे प्रमाण घटले आहे. त्यामुळे पॉझिटिव्ह रुग्णांची संख्या कमी होत असल्याचे बोलले जात आहे.

शहरात पॉझिटिव्ह रुग्णांची संख्या घटली आहे. एका रुग्णामागे सरासरी ३० ते ४० जणांची तपासणी केली जाते. सध्या दररोज १५ ते २० रुग्ण आढळून येत आहेत. त्यानुसार चारशे ते पाचशे चाचण्या होणे अपेक्षीत आहे. पण महापालिकेतर्फे दररोज दीड हजारांपेक्षा जास्त चाचण्या केल्या जात आहेत.
-डॉ. नीता पाडळकर, आरोग्य वैद्यकीय अधिकारी