औरंगाबाद: महापालिकेकडे एक लाखापेक्षा अधिक लसी शिल्लक आहेत. मात्र, लस घेण्यासाठी नागरिकांचा प्रतिसाद कमी झाला आहे. त्यामुळे महापालिका प्रशासनाने पुन्हा एकदा कोरोना संसर्गाच्या सुपर स्प्रेडरकडे लक्ष केंद्रित केले आहे. नाशिक महापालिकेने सुपर स्प्रेडससाठी दोन लसींमधील अंतर कमी केले आहे. त्याधर्तीवर शहरातदेखील दोन लसींमधील अंतर कमी करण्यासाठी नाशिक महापालिकेकडून माहिती मागविण्यात आल्याचे महापालिकेच्या आरोग्य वैद्यकीय अधिकारी डॉ. नीता पाडळकर यांनी सांगितले.

कोरोना प्रतिबंधक लसींचा काही काळ तुटवडा होता. नेमक्या त्याचवेळी दुसरी लाट भरात होती. त्यामुळे नागरिकांनी लसीकरण केंद्रावर मोठी गर्दी केली. लसीकरणासाठी आवश्‍यक टोकन घेण्यासाठी नागरिक पहाटेपासून ठाण मांडून बसल्याचे चित्र होते. पण गेल्या महिनाभरापासून कोरोना संसर्गाची दुसरी लाट ओसरली आहे. त्यामुळे नागरिकांमधील भीती कमी झाली असून, लसी घेण्यासाठी चालढकल सुरू झाली आहे. दरम्यान महापालिकेला गेल्या काही दिवसांपासून लसींचा मुबलक साठा मिळत आहे. शिवाय बजाज समुहाने एक लाख १२ हजार ५०० लसी महापालिकेला दिल्या आहेत. त्यामुळे शिल्लक लसींची संख्या एक लाखापेक्षा जास्त आहे. असे असताना प्रत्येक लसीकरण केंद्रावर दिवसभरात केवळ ३० ते ४० एवढ्या प्रमाणात लसीकरण होत आहे. लसीकरणाची संख्या वाढविण्यासाठी प्रशासनातर्फे प्रयत्न सुरू करण्यात आले आहेत.

शहरातील गर्दीच्या ठिकाणी काम करणारे कर्मचारी, कामगार तसेच जास्तीत जास्त नागरिकांच्या संपर्कात येणारे नागरिक अशा सुपर स्प्रेडरच्या लसीकरणावर जोर दिला जाणार आहे. यासंदर्भात डॉ. पाडळकर यांनी सांगितले की, नाशिक महापालिकेने सुपर स्प्रेडरच्या दोन लसीमधील कालावधी कमी करण्याचा निर्णय घेतला आहे. त्यामुळे नाशिक महापालिकेकडून माहिती मागविण्यात आली आहे. त्याच धर्तीवर शहरातील सुपर स्प्रेडला लसीकरण करण्याबाबत विचार सुरू आहे.

आत्तापर्यंतचे लसीकरण-

• एकूण उद्दिष्ट- ११ लाख ७६ हजार ९९९

• पहिला डोस घेतलेले नागरिक- ४ लाख ८७ हजार ९३८

• दोन्ही डोस घेतलेले नागरिक-२ लाख ५ हजार ७७०

• एकूण- ६ लाख ९३ हजार ७०८