औरंगाबाद : पत्नीशी फोनवर बोलत ‘तू मला आवडत नाहीस, माहेरहून घर बांधण्यासाठी दोन लाख रुपये घेऊन ये, तरच घरात घेईन’ असे म्हणत पतीने तीन वेळेस तलाक म्हणत फोन ठेवला. या प्रकरणी पत्नीने पोलिसांत धाव घेत फिर्यादी दिल्याने छळ करणाऱ्या पतीसह दोन दीर, सासू, सासरे अशा पाच जणांविरोधात एमआयडीसी सिडको पोलिस ठाण्यात गुन्हा दाखल करण्यात आला आहे.

शेख अश्पाक शेख अन्वर (२६) असे त्या पतीचे नाव असून, सासू शरीफा शेख, सासरा अन्वर शेख, दीर फारुख शेख, शाहरुख शेख (सर्व रा. माणिकनगर, गल्ली क्र. ७, नारेगाव) अशी त्या संशयित आरोपींची नावे आहेत. या प्रकरणी २२ वर्षीय पिडीतेने दिलेल्या फिर्यादीनुसार तिचा विवाह १५ सप्टेंबर २०१९ रोजी अश्पाकसोबत झाला होता. लग्नानंतर सहा महिने तिला चांगली वागणूक मिळाली. त्यानंतर मिस्त्री कामगार म्हणून काम करणाऱ्या पतीसह दीर, सासू, सासरे यांनी ‘घर बांधण्यासाठी माहेरहून दोन लाख रुपये घेऊन ये, तेव्हाच घरात घेईन’ असे म्हणत वारंवार छळ करून घराबाहेर हाकलून दिले.

तेव्हापासून पिडीता माहेरी राहत होती. दरम्यानच्या काळात महिला भरोसा सेलमध्येही समझोता करण्याचा प्रयत्न करण्यात आला. मात्र, पतीसह सासरच्या मंडळींनी पोलिसांसमोर नरमाईची भूमिका घेतली, मात्र नंतर त्रास देणे सुरुच ठेवले. त्यावेळी तीन वेळेस घरच्यांच्या बैठकीही झाल्या. पिडीता माहेरी राहत असल्याने तिने पतीला आपणास नांदावयास घेऊन जा, सांगण्यासाठी फोन केला असता, पती अश्पाक याने ‘मला तू आवडत नाहीस’ म्हणत पैसे घेऊन ये, तेव्हाच घरात घेईन अशी भूमिका घेत पत्नीला तीन वेळेस तलाक, तलाक, तलाक म्हणत फोन ठेऊन दिला. या प्रकरणी पत्नीच्या फिर्यादीवरून पतीसह सासरच्या मंडळींविरोधात गुन्हा दाखल झाला. पुढील तपास उपनिरीक्षक अबूज करत आहेत.